23 июля 2008 г.
Районти ял хуçалăх кооперативĕсемпе колхозсенче выльăх апачĕ хатĕрлес ĕçсем малаллах пыраççĕ. Июлĕн 22-мĕшĕ тĕлне нумай çул ÿсекен курăксене — 5148 гектар çинче, пĕр çул ÿсекеннисене 994 гектар çинче çулнă. Пĕрлешÿллĕ хуçалăхсем пикенсех утă, сенаж хатĕрлеççĕ. Çÿлерех асăннă кун тĕлне районĕпе 4548 тонна утă янтăланă. “Урожай” колхозра — 520 тонна, “Слава” ЯХПК — 500 тонна, “Труд” ял хуçалăх предприятийĕнче — 381 тонна, “Дружбăра” — 350 тонна, “Госсорткомиссия” ФПУ-ра — 330 тонна, “Асаново” хуçалăхра 300 тонна утă хатĕрлеме ĕлкĕрнĕ.
Ял хуçалăх предприятийĕсенче 218234 тонна сенаж янтăланă. Ку енĕпе “Луч” (2520 тонна), “Восток” ( 2500 тонна), “Асаново” (2400 тонна), “Труд” (2243 тонна) хуçалăхсем, “Урожай” колхоз (2310 тонна) уйрăмах тăрăшуллă ĕçлеççĕ.
Хăш-пĕр хуçалăхсенче çĕр улми анисене колорадо нăррисенчен им-çам сапаççĕ. Хăшĕсем çак кунсенче кĕрхи тырăсене вырма планлаççĕ.
Пур ĕçе те вăхăтра пурнăçлани темрен паха. Çанталăкăн уяр кунĕсемпе пĕлсе усă курасчĕ.
Источник: "Каçал Ен"