12 июля 2008 г.
Республика Президенчĕ Николай Федоров оперăпа балет театрĕн нумай функциллĕ залĕнче ЧР Министрсен Кабинечĕн ларăвне, район-хула пуçлăхĕсен Канашĕн тата республика Президенчĕ çумĕнчи приоритетлă наци проекчĕсене пурнăçлас енĕпе ĕçлекен Канашĕн ларăвне ирттернĕ. Ларусен ĕçне Правительство членĕсемсĕр пуçне муниципалитет тытăмĕсен ертÿçисем, строительство организацийĕсене ертсе пыракансем хутшăннă.
ПРАВИТЕЛЬСТВО членĕсем малтанах Чăваш Республикин “Чăваш Республикин экономикипе социаллă пурнăçне 2020 çулчченхи тапхăрта аталантармалли Стратеги çинчен” саккунне улшăнусем кĕртесси çинчен” саккун проектне пăхса тухса ырланă. ЧР экономика аталанăвĕпе суту-илÿ министрĕ Иван Моторин пĕлтернĕ тăрăх, Чăваш Республикин “Чăваш Республикин экономикипе социаллă пурнăçне 2020 çулччен аталантармалли Стратеги çинчен» саккунне маларах пăхса тухса тата пĕтĕм халăх итлевĕ ирттерсе Патшалăх Канашĕн сессийĕнче çирĕплетнĕ. Халĕ пăхса тухакан проектра сăмах муниципалитет тытăмĕсен экономикипе социаллă пурнăçне аталантарасси çинчен пырать. Ку вăл çын пурнăçĕн условийĕсене улăштарса лайăхлатас енĕпе туса ирттермелли пысăк ĕçсен анлă программи шутланать. Унта муниципалитет тытăмĕсен экономикине, социаллă пурнăçне, экологи, политика, ăс-хакăл тĕлĕшĕнчи пулăмсене анлăлатасси тĕп вырăн йышăнать.
Çак тĕллеве пурнăçлама чи малтанах кашни муниципалитет тытăмĕн уйрăмлăхĕпе малашлăхне палăртмалла; вĕсен территорийĕсенче экономикăна çирĕп аталантармалли çĕнĕ центрсем йĕркелемелле; социаллă пурнăçпа экономикăна аталантармалли хушма условисем палăртмалла, вĕсене лайăхлатса пымалла; инноваци тата инфратытăм политикине çирĕплетсе хула-район тăрăхĕсенче наукăпа техникăна аталантармалли тата халăха пĕлÿ парассине вăйлатмалли майсем; пысăк технологипе ĕçлекен территори-производство кластерĕсем туса хумалла; туризм индустрине, транспорт çыхăнăвне вăйлатмалла.
Аталанура республика социаллă пурнăçпа экономикăра халиччен тунă çитĕнÿсем тĕп вырăн йышăнаççĕ. Ялсенче пысăк программăна пурнăçланă, килсене çутçанталăк газĕ çитернĕ. Пурăнмалли çурт-йĕр, никĕс шкулсем, культура, сывлăх сыхлавĕн, физкультурăпа спорт объекчĕсем тăвасси графикран маларах пырать. Телефон тата çыхăну тĕпрен лайăхланнă. Хальхи вăхăтра çĕре уйрăм харпăрлăха куçарас енĕпе тăрăшса ĕçлеççĕ. Чăваш Ен çыннисене ĕçмелли паха шывпа тивĕçтереççĕ. Ялсене хытарса тунă автомобиль çулĕсем хывса çитереççĕ. Анчах ял ватăлса пыни, вĕсенче ăста кадрсем çителĕксĕрри хытах шухăшлаттарать.
Муниципалитет тытăмĕсен стратеги проектĕнче çын пурнăçĕпе çыхăннă пулăмсем паллă вырăн йышăнаççĕ. Ку вăл — пысăк хуласен çывăхĕнчи зонăсене аталантарса çирĕплетесси, рынока экологи тĕлĕшĕнчен паха апат-çимĕçпе тухасси, çамрăксене хальхи кăткăс производствăра ĕçлеме вĕрентесси тата хăнăхтарасси, канма, сывлăха çирĕплетме условисем туса хурасси тата ытти те.
Муниципалитетсен 2020 çулчченхи аталанăвĕн Стратеги проектĕнче Чăваш Ен зонисене территорисем тăрăх аталантарма палăртни уйрăмах паллă вырăн йышăнать. Хула-районсене тăватă зонăна пайланă.
Стратеги проектĕнче Центр (Вăрмар, Канаш, Тăвай, Йĕпреç, Вăрнар районĕсем), Кăнтăр-хĕвел тухăç (Комсомольски, Елчĕк, Патăрьел, Шăмăршă районĕсем), Кăнтăр-хĕвел анăç (Хĕрлĕ Чутай, Çĕмĕрле хулисем) зонисене те тĕплĕн тишкерсе экономикăпа социаллă пурнăç тĕлĕшĕнчи лару-тăрăва хак панă, малашнехи ата- лану майĕсене витĕмлĕ палăртнă.
Министр пĕлтернĕ тăрăх, зонăсене çапла хакласа тухни, муниципалитет тытăмĕсен лайăх тата начар енĕсене шута илни малалла аталанмалли тĕп çул-йĕрсене витĕмлĕ те тĕрĕс палăртма май парĕ.
Президент республикăри ял хуçалăхĕнче усă курмасăр выртакан çĕрсене çаврăнăша кĕртес енĕпе район пуçлăхĕсене ĕçе хăвăртлатма хушрĕ, ку ĕçе проектра палăртнă пек 2010 çулта мар, çитес çулах вĕçлемелле. “Тимсĕр хуçасенчен илсе çĕре чăн-чăн хуçа аллине памалла”,— терĕ вăл.
Район-хула пуçлăхĕсен Канашĕн, республика Президенчĕ çумĕнчи приоритетлă наци проекчĕсене пурнăçлас енĕпе ĕçлекен Канашĕн ларăвне хутшăннисем район-хуласенче пурăнмалли çурт-йĕр тăвасси мĕнле пынине, “Шупашкар: 500 çул” парка çĕнетсе лайăхлатас тĕлĕшпе пурнăçламалли мерăсене сÿтсе явнă, республика çутă фестивалĕн “Пултăр çутă!” календарьне пăхса тухнă.
Оперăпа балет театрĕнче иртнĕ мероприятие Чăваш Республикин ĕç тăвакан влаç органĕсен официаллă порталĕпе онлайн меслечĕпе кăтартнă, Чăваш Ен аталанăвĕн çивĕч ыйтăвĕсене сÿтсе явнă материалсемпе Интернет сечĕпе усă куракансем туллин паллашнă.
Источник: "Каçал Ен"