09 июля 2008 г.
— Хырхĕрри ял библиотеки модельлĕ статуса илнĕренпе унта çÿрекенсем йышланчĕç. Кĕнеке илме, хаçат-журналпа паллашма килнисĕр пуçне, хăйсене интереслентерекен тĕрлĕ ыйтупа та çитеççĕ. Уйрăмах ачасем татăлма пĕлмеççĕ. Видеофильмсем пăхаççĕ, компьютерпа выляççĕ,— тет В.А.Горбунова библиотекарь.
Чăннипех те условисем çителĕклĕ. Вăл е ку кĕнекен содержанине, вĕренÿ программине кĕнĕ материалсене çырнă дисксем пур. Компьютерпа кирлĕ информацие хăвăрт тупма пулать. Вера Анатольевна библиотекăна килекенсене тарават кĕтсе илет. Хаваспах вĕсене кирлĕ литература суйласа илме пулăшать. Унта пулмасан районти тĕп библиотекăна заказ парать.
В.Горбунова районта иртекен тĕрлĕ конкурссене те хутшăнать. Акă, кăçал библиотекарьсен кунне халалланă «ХХI ĕмĕрти библиотекарь» конкурса хутшăнчĕ. Унта пултарулăхпа палăрчĕ, виççĕмĕш вырăн çĕнсе илчĕ.
Библиотека кĕнекесемпе, хаçат-журналпа пуян. Вера Анатольевна шучĕпе, çапах та ку пур енлĕн те тивĕçтереймест-ха. Çĕнĕ кĕнекесем, халăхăн тĕрлĕ сийне тивĕçтерекен хаçат-журнал татах та кирлĕ. Аудио-, видеокассетăсем, компакт-дисксем, электронлă кĕнекесем çителĕксĕр. Вăл библиотекăра тĕрлĕ тематикăпа стендсем, кĕнеке выставкисем йĕркелет. Çакă вулакансене çĕнĕ кĕнекесемпе çийĕнчех паллашма май парать.
В.Горбунова Хырхĕрри культура çурчĕ çумĕнчи художество пултарулăх коллективне те çÿрет
Источник: "Каçал Ен"