09 июля 2008 г.
Райпо совечĕ çулсеренех район çыннисене куллен кирлĕ таварсемпе тивĕçтерессине лайăхлатас енĕпе ĕçлет. Тавар сутни çеç мар, магазинсене кĕрсе тухма кăмăллă пултăр тесе тăрăшать. Юлашки çулсенче çеç «Гастроном» магазина тĕпрен юсарĕç. Вăл хуларисенчен пĕрре те кая мар. «Мир продуктов» магазина та районта пурăнакансем хапăлласа çÿреççĕ. Кунта хăвна килĕшекен кирек мĕнле апат-çимĕçе те суйласа илме пулать. Аллупа тытса куратăн, коробка е урăх савăт çинче мĕн çырнине тимлĕн вулама та вăхăт пур. Кăмăл пулсан туянатăн.
«Мир продуктов» магазинра 9 çын тăрăшать. В.Г.Федорова заведующи сутуçăсем клиентсен ыйтăвĕсене туллин тивĕçтерес енĕпе тăрăшнине палăртрĕ. — Тавар туянма килекенсене сутуçăсем вăл е ку апат-çимĕçе суйаса илме пулăшаççĕ. Тепĕр чухне ватăсем, инвалидсем те пирĕн магазина кĕреççĕ. Хăшĕ-пĕрин куçĕсем курмаççĕ пулĕ, мĕн çырнине ăнланманни пулать. Ун пек чух сутуçăсем вĕсене пулăшма хатĕр,— тет Валентина Геннадьевна.
М.А.Филиппова, А.В.Ильина, И.И.Саландаева, Л.Н.Карзакова, В.Г.Лаврушкина, Г.С.Орлова, О.Н.Николаева сутуçăсем чăннипех те маттур. Т.В.Никитина магазина тирпейлесе тăрать.
— Аш-какай, пулă, пахчаçимĕç продукцине халăх хапăлласа туянать,— пĕлтерет В.Федорова заведующи.
Источник: "Каçал Ен"