05 июля 2008 г.
Тĕлĕнмелле ĕçчен те пултаруллă çынсем вăй хураççĕ «Заря» ял хуçалăх кооперативĕн ферминче. Ял халăхĕ тутлă ыйхăран вăраничченех ура çинче ферма ĕçченĕсем. Паян та акă тул çутăлнă-çутăлманах ĕçре дояркăсемпе пăру пăхакансем.
Чăнах та хастар, хăйсен ĕçне чунтан парăннă çынсем ĕçлеççĕ кунта. Зинаида Васильева дояркăнах илер. 8 класс пĕтернĕ çамрăк хĕр выльăх-чĕрлĕх пăхас ĕçе суйласа илнĕ. Кăçал вара Зинаида Николаевна фермăра ĕçлеме пуçланăранпа 35 çул çитет. Нумай Хисеп грамотипе хаклă парнене тивĕç пулнă доярка. Ăна «Коммунизмла ĕç ударникĕ» паллăпа та наградăланă. Роза Павловăпа Раиса Алексеева та хăйсен ĕçне юратса пурнăçлаççĕ. Ахальтен мар ĕнтĕ «Заря» ял хуçалăх кооперативĕ сĕт суса илес енĕпе районта малти вырăнта пырать. Паянхи куна кашни ĕнерен талăкра 19-шар килограмм сĕт суса илеççĕ.
Пăру пăхакансем те хăйсен ĕçĕнче çитĕнÿсем тăваççĕ. Нина Гавриловнăпа Николай Павлович Давыдовсем 2-мĕш çул пăрусене çулталăка çитиччен çи- тĕнтереççĕ. Пăру самăртас ĕçре Валентина Викторовна Прокопьева пултаруллă. Фермăра вăл 1984 çултанпа вăй хурать. Елена Павлова та 1987 çултанпа пăру пăхнă çĕрте тăрăшать. Ку ĕçре пысăк çитĕнÿсем тунă Елена Григорьевна. Çамрăк выльăх ÿт хушаслăхĕн кăтартăвĕсемпе вăл пĕрре мар район шайĕнче те палăрнă.
Шел пулин те, фермăра выльăх-чĕрлĕх чирлемесĕр пулмасть. Темле пулсан та ветеринар кирлех. Çĕнĕ Мăрат ферминчи ăста выльăх тухтăрĕ – Галина Чубукова. Вăл Вăрнарти ял хуçалăх техникумне вĕренсе пĕтернĕ хыççăн «Заря» ял хуçалăх кооперативĕн сысна ферминче ĕçлеме пуçланă. Çумăр тăкнă-и, çил-тăман алхаснă-и, вăл кÿршĕ ялти – Вутланри сысна фермине васканă. 27 çул ĕнтĕ юратса пурнăçлать Галина Вениаминовна çамрăкла пуçăннă ĕçе.
Валентина Николаевна Горшковăпа Антонина Васильевна Малышева тĕрлĕ ĕçре тăрăшаççĕ. Анатолий Васильевич Туймушкин, Вячеслав Геннадьевич Смолин кĕтÿçсем, Илья Васильевич Горшков выльăх пăхакан хăйсен ĕçне юратаççĕ, чунтан тăрăшса ĕçлеççĕ.
Коллектив хастар, мал ĕмĕтлĕ ертÿçĕсĕр малалла каяймасть. Ферма ĕçченĕсем Петр Васильевич Зверев ертсе пынипе çитĕнÿсем патне ăнтăлаççĕ. Вăл Вăрнарти ял хуçалăх техникумне хĕрлĕ дипломпа вĕренсе пĕтернĕ хыççăн пĕр çулталăк «Пайгас» ял хуçалăх кооперативĕнче ферма заведующи-йĕнче ĕçленĕ. 1998 çултанпа «Заря» хуçалăхра зоотехникра тăрăшать. Кăçал утă уйăхĕнче Петр Васильевич кунта ĕçлеме пуçлани 10 çул çитрĕ. Ĕçленĕ вăхăтрах вăл куçăмсăр майпа Чăваш патшалăх ял хуçалăх академийĕнче зооинженер профессине алла илнĕ, 2002 çулта Германире 6 уйăх стажировкăра пулнă. Унта вăл выльăх-чĕрлĕх пăхса ÿстермелли çĕнĕ меслетсемпе паллашнă. Тен, Петр Васильевич ют çĕр шывран вĕренсе килнĕ выльăх-чĕрлĕх пăхас «вăрттăнлăхсене» пулах «Заря» ял хуçалăх кооператив ферми пысăк çитĕнÿсем тăвать. 2006 çулта ăста зоотехник 100 ĕне пуçне 92 пăру илнĕшĕн диплома тивĕç пулнă, кăçал вара республикăри техник-осеменаторсен 27-мĕш конкурсĕнче 1-мĕш вырăн йышăннă, хаклă парнене тивĕçнĕ.
«Мĕншĕн сирĕн фермăра ĕнесем сĕт нумай параççĕ, пăрусем лайăх çитĕнеççĕ?» тесен хурав памарĕç. Мĕнре-ши вăрттăнлăхĕ? Тем тесен те, ĕçе тăрăшса пурнăçланинче, выльăх-чĕрлĕхе юратнинче, унпа пĕр чĕлхе тупма пĕлнинче. Кунсăр пуçне, выльăх-чĕрлĕхрен ытларах продукци илес тесен лайăх тăрантармалла, пахалăхлă апат хатĕрлемелле. Зооветеринарипе гигиена правилисене çирĕп пăхăнмалла. Çĕнĕмăратсем вара çак енĕпе тимлĕ ĕçлеççĕ. Ĕçлесен çитĕнÿ пулатех.
Источник: "Каçал Ен"