02 июля 2008 г.
Ирхине 8 сехет иртнĕ хыççăнах районти çар комиссариачĕ умне призывниксем тăванĕсемпе, тус-тантăшĕсемпе, çывăх çыннисемпе килсе çитрĕç. Хут купăс сасси, юрă-кĕвĕ янăраса çеç тăчĕ. Пĕрисен куçĕсем те шывланчĕç, теприсем вара çара каякан çамрăксене маттур салтак пулма чĕнсе каларĕç. Июнĕн 30-мĕшĕнче çурхи призывпа çар ретне тăракансен пысăк ушкăнĕ Канаша çул тытрĕ. Районти тĕрлĕ ялтан 15 салтака ăсатма пуçтарăннă. Ыталашса, ырă сунса, асăнмалăх сăн ÿкерчĕк туса каччăсене çар комиссариачĕн çуртне кĕртсе ячĕç. Кунта вĕсемпе офицерсем инструктаж ирттерчĕç, алă пустарчĕç. Районти çар комиссарĕ А.А.Маурин яшсене салам сăмахĕсем каласа сĕнÿсемпе канашсем пачĕ. Çара каякансем хушшинче тин çеç шкул пĕтернисем те, специальноç илме ĕлкĕрнисем те пур.
Пĕлетпĕр ĕнтĕ, çурхи çар призывĕ июлĕн 1-мĕшĕнче вĕçленчĕ. Ку призывра районтан 65 çамрăк çара тухса кайнă. Вĕсем çĕршывăн тĕрлĕ кĕтесĕсенче служба ирттереççĕ.
— Пирĕн асатте те, атте те, эпир те Кольăпа çар службинче пулнă. Володя та çарта хăйне лайăх енчен çеç кăтартасса шанатпăр. Салтакра пулни пурнăçа ăнланма, вăй-хал, кăмăл-туйăм енчен
çирĕпленме пулăшать. Унтан чăн-чăн арçын пулса таврăнатăн, — терĕ Аслă Чурачăкри Д.Тумаланов. Вăл кĕçĕн шăллĕне Владимир Тумаланова çара ăсатма килнĕ. Ăна ăнăçу, пултарулăх сунчĕ вăл.
Источник: "Каçал Ен"