28 июня 2008 г.
Хальхи вăхăтра çĕршывра çурхи çар призывĕ пырать. Пирĕн районти çамрăксем те салтак тумне тăхăнаççĕ. Призыв июлĕн 1-мĕшĕччен пырать. Кăçал çар ретне тăракансен çулталăк çеç службăра пулмалла. Пĕрисем çара каяççĕ, теприсем вара çĕршыв умĕнчи патриотизм-ла тивĕçĕсене пурнăçласа таврăнаççĕ.
Уйăх каяллах ÿкерсе илнĕччĕ Александровка каччисене, Руслан Ижедеровпа Петр Дьяконова. Вĕсем, тин çеç яла таврăннăскерсем, çамрăк юлташĕсене ăсатма çар комиссариачĕ умне пынăччĕ. Кĕçĕннисене хавхалантарса тăчĕç, лайăх салтак пулма ăнăçу сунчĕç.
— Çар пире ÿт-пÿрен те, кăмăл-туйăм енчен те çирĕплетрĕ. Пурнăçа ăнланма, йывăр лару-тăрура кирлĕ йышăну тума хăнăхтарчĕ. Мĕн тери яла килес, тăвансене, юлташсене, çывăх çынсене курас килет иккен ин-çетре пулсан. Питĕ тунсăхларăмăр, — теççĕ Русланпа Петр. Вĕсем пĕр çулхисемех, пĕр вăхăтрах çар ретне тăнă, таврăнасса та пĕр кунсенчех ялта пулнă. Яшсем çар тумне те хывса ĕлкĕрейменччĕ-ха. Пуçтарăннисем умĕнче тÿрех тумĕпе уйрăлса тăраççĕ.
Руслан Калининград обла-çĕнче службăра тăнă, Балти тинĕс-çар флочĕн морякĕ пулнă. Петр та инçех мар çар хĕсметĕнче тăнă. Ленинград облаçĕнчи Лоденое хулинчи авиаци полкĕнче салтак «пăтти çинĕ». Каччăсем иккĕшĕ те 1 çул та 6 уйăх службăра тăнă. Кăçал салтака каякансем те вĕсем пек маттур пуласса шанма пулать. Пирĕн район каччисем çар ти-вĕçне яланах кирлĕ пек ирттернĕ. Ахальтен мар ашшĕ-амăшĕ патне командирсенчен Тав çырăвĕсем килеççĕ, вĕсене пултаруллă, хăюллă ывăлсем пăхса çитĕнтернĕшĕн, Тăван çĕршыва юратма хăнăхтарнăшăн ырă сăмахсем калаççĕ.
Источник: "Каçал Ен"