28 июня 2008 г.
Юлашки çулсенче экономикăн кашни сферинчех ăнăçлă ĕçлекен предприятисен рейтинг-не тума пуçларĕç. Чăваш Енри агропромышленноç комплексĕнче те йĕркеленĕ çак ĕçе.
Июнĕн 21-мĕшĕнче Шупашкарти «Экспо-Контур» выставка комплексĕнче «Агро-100» клубăн презентацийĕ иртнĕ. Клуб республикăри чи лайăх 100 хуçалăха (2007 çула ăнăçлă вĕçленĕскерсене) пĕрлештернĕ. Рейтинга йĕркеленĕ чухне çак кăтартусене шута илнĕ: пĕр ĕçлекен пуçне тивекен выручка; пĕр гектар çĕр пуçне мĕн чухлĕ выручка илни; продукцие сутса пĕр ĕçлекен пуçне мĕн чухлĕ тупăш тухни; ĕçлекенсен уйăхри вăтам ĕç укçи; рентабеллĕх.
Чи лайăх хуçалăх ятне тата «Агро-100» клубăн пĕрремĕш номерлĕ билетне пирĕн районти «Çĕрулмие мухтав» агрофирма илме тивĕçнĕ. «Чăваш бройлерĕ», «Ольдеевская» агрофирма» АХО, Пăрачкав рай-
онĕнчи «Киря» ЯХПК, Патăрьел районĕнчи «Батыревское» АХО та — лайăххисен шутĕнче.
ЧР «Агро-Инноваци» унитарлă предприятин специалисчĕсем тунă рейтинг Комсомольски районĕнчи ялхуçалăх предприятийĕсем ыттисенчен ăнăç-лăрах ĕçленине кăтартнă. Пирĕн районти 17 хуçалăх «Агро-100» клуб членĕ пулса тăни çакна çирĕплетет те. Акă вĕсем: «Слава картофелю», «Нива» агрофирмăсем, «Рассвет», «Восток», «Труд», «Заря», «Дружба», «Пайгас», «Слава» тата «Луч» ял хуçалăх производство кооперативĕсем, «Искрăпа» «Урожай» колхозсем, «Кызыл сабанча», Минатуллинăн, «Родина» хресченпе фермер хуçалăхĕсем, «Дубовка», «Сюрбеево» тулли мар яваплăхлă организацисем. Асăннă хуçалăхсенчи ертÿçĕсемпе ĕçченсене ăшшăн саламлатпăр, малашне те ÿсĕмлĕ ĕçлеме çирĕп сывлăх, иксĕлми вăй-хал сунатпăр.
Кÿршĕсем те, патăрьелсем, япăх мар ĕçлеççĕ. Вĕсен 13 хуçалăхĕ рейтинга лекнĕ. Виççĕмĕш вырăнта — Канаш районĕ (9 предприяти). Красноармейски тата Сĕнтĕрвăрри районĕсенчи пĕр хуçалăх та лайăххисен шутне кĕмен.
Источник: "Каçал Ен"