21 июня 2008 г.
Районти ял хуçалăх предприятийĕсенчи уй-хирсенче ĕç шавĕ тăрать. Хуçалăхсем утă хатĕрлеççĕ, сенаж хываççĕ, çĕрулми, тымарçимĕç, пахчаçимĕç уйĕсенче тăрăшаççĕ.
Акă, кĕске вăхăтрах “Труд” ял хуçалăх кооперативĕнче 70 тонна, “Славăра” 50 тонна утă хатĕрлеме пултарнă. Июнĕн 19-мĕшĕ тĕлне пĕрлешÿллĕ хуçалăхсем пурĕ 1013 гектар нумай çул ÿсекен курăксем çулнă. Ку енĕпе “Труд”, “Слава”, “Восток” ЯХПК-сем, “Искра” колхоз тухăçлă ĕçлеççĕ. Пĕтĕмĕшле çулмалли лаптăк – 5724 гектар. Хуçалăхсенче вăхăтра утă, сенаж хатĕрлес енĕпе уйрăмах çирĕп ĕçлеççĕ. Çанталăкăн уяр кунĕсемпе тивĕçлĕн усă кураççĕ. Çĕр улми, пахчаçимĕç уйĕсенче те хĕрÿ вăхăт. Вĕсене вăхăтра çумкурăкран тасатни паха. Ку енĕпе хуçалăхсем имçамсемпе усă кураççĕ. Çĕр улми йăранĕсен хушшисене кăпкалатнă. Пысăк тухăç илес тесен палăртнă ĕçсене вăхăтра пурнăçламалла.
Источник: "Каçал Ен"