21 июня 2008 г.
ЧĂВАШ наци конгресĕн президиумĕн çак кунсенче иртнĕ черетлĕ ларăвĕнче Республика кунĕпе çыхăннă ыйтăва пăхса тухнă. Йĕркелÿ комитечĕн ертÿçи К.Портнов хăйĕн отчетĕнче Республика кунне Чăваш Ен тулашĕнчи ентешĕмĕрсем чăтăмсăррăн кĕтнине, регионсенчи наци культура пĕрлешĕвĕсемпе центрĕсенчен йышлă делегацисем килессе пĕлтернĕ. Малтан палăртнă тăрăх, Раççейĕн 81 кĕтесĕнчен, Эстонирен, Казахстанран, Беларуçрен, Молдавирен, АПШран, Германирен, Францирен тата ытти çĕртен 500 ытла чăваш килмелле. Ĕçлĕ тĕл пулусемпе кану программи анлă та тĕрлĕ енлĕ. «Шупашкар: 500 çул» паркра ятарласа «Чăваш уявĕ» иртет. Унта республикăри районсенчи тата регионсенчи художество пултарулăх коллективĕсен смотр-конкурсĕ, чăваш купăсçисен, ташăçисен тата чăваш тумĕн конкурсĕсем, чăвашсен авалхи тĕрлĕ вăййи, спорт ăмăртăвĕсем пулаççĕ.
Ларура Чăваш наци конгресĕн президенчĕ Г.Архипов, «Чăваш кĕрешĕвĕ» ассоциацин вице-президенчĕ В.Васильев, Шупашкарти чăваш чĕлхи учителĕсен ассоциацийĕн ертÿçи Л.Игнатьева тата ыттисем Республика кунне чăвашлăх сĕмĕ кĕртме паха сĕнÿсем панă.
Источник: "Каçал Ен"