11 июня 2008 г.
Пултаруллă ачасем çитĕнеççĕ Анат Тимĕрчкасси çĕрĕ çинче. Тĕрлĕ енлĕн аталанса ÿсекенсем спортра та, вĕренÿре те, обществăлла ĕçсенче те пысăк çитĕнÿсем тăваççĕ. Паллах, çитĕнÿ хыççăн çитĕнÿ тăвасси алă усса ларнипе пулмасть. Питĕ лайăх ăнланаççĕ ăна ачасем... Çакна тĕпе хурса шкулта ĕçлекен кружок-секцисенче хăйсен ăсталăхне туптаççĕ, кунран-кун çĕннине вĕренеççĕ. Кашни кун тенĕ пекех уроксем хыççăн та шкул территорийĕнче ачасен сассийĕ татăлмасть. Вĕсем пушă вăхăта усăллă ирттереççĕ. Шкулта уйрăмах спорт енĕпе секцисем чылай. Çăмăл атлетика, баскетбол, волейбол, кĕрешÿ секцийĕсене ачасем юратса çÿреççĕ. 2005 çулта А.П.Капитонов тăван шкула пысăк парне — ачасем валли кĕрешÿ кавирĕ парнелерĕ. 2005 çулхи авăн уйăхĕнче шкулта ирĕклĕ майпа кĕрешекенсен секцийĕ йĕркеленчĕ. В.Х.Денисов тренер пулăшса пынипе ачасем кунран-кун кĕрешĕвĕн вăрттăнлăхĕсене, мелĕсене вĕренсе пычĕç. Ăмăртусене хутшăнчĕç, малтисен йышĕнче пулчĕç. Вăхăт хăй еккипех малалла шурĕ. Кăçал ачасем ирĕклĕ майпа кĕрешекенсен хăнăхăвне çÿреме пуçланăранпа виççĕмĕш çул çитрĕ. Кашни ытларикунпа кĕçнерникун ирĕклĕ майпа кĕрешекен ачасем шкул спортзалне пухăнаççĕ. Хăнăхусем хыççăн вăйсене тĕрĕслемелли ăмăртусем... Çĕнтерÿсем, выляса янисем... Ун хыççăн каллех — хăнăхусем.
Нумаях пулмасть В.Х.Денисов çамрăк спортсменсен çитĕнĕвĕ епле туптанни çинчен каласа пама кăмăл турĕ.
— Валерий Христанович, Анат Тимĕрчкасси шкулĕнче ирттернĕ пĕрремĕш хăнăхăва ас тăватăр-и? Мĕнлерех шухăшсем çуралчĕç ун чухне?
— Мана çак шкулта тренер пулса ĕçлеме ыйтсанах, эпĕ пĕр иккĕленмесĕр килĕшрĕм. Анат Тимĕрчкасси ялĕнче тăрăшуллă ачасем ÿснине пĕлнĕ. Çăмăл атлетика ăмăртăвĕсенче пĕрмаях палăратчĕç вĕсем. Вăл вара ирĕклĕ кĕрешÿре те пулăшать. Çакăн пирки физкультура учительне В.И.Плешкова тав тăватăп. Пĕрремĕш хăнăхăва, паллах, астăватăп. Пĕр йĕркене тăнă ачасем ман çине тĕмсĕлсе пăхаççĕ. Вĕсем ăста кĕрешме вĕренес килни куç умĕнчех.
— Пĕрремĕш ăмăрту та асрах пулĕ?
— Çапла. Хăнăхусене виçĕ уйăх ирттернĕччĕ. Совет Союзĕн Геройĕн Ф.Н.Черновăн ячĕпе республика шайĕнче турнир ирттерчĕç. Эпир те хутшăнса пăхас терĕмĕр. Пĕрремĕш ăмăртурах кăтартусем лайăх пулчĕç. Хăйсен виçисенче Максим Анисимов 2-мĕш, Ирина Николаева 1-мĕш, Эдуард Иванов 3-мĕш вырăнсене çĕнсе илчĕç. Ман шутпа, питĕ пысăк çитĕнÿсем турĕç вĕсем.
— Анат Тимĕрчкасси шкулĕнче те турнирсем йĕркеленеççĕ.
— 2006 çултан пуçласа А.П. Капитонов парнисене çĕнсе илессишĕн, чаплă велосипе- дисткăна З.В.Ефремовăна асăнса ăмăртусем ирттеретпĕр. Чи малтан вĕсем район шайĕнче анчах пулчĕç, халĕ республика пĕлтерĕшне те çитрĕç.
— Эсир вĕрентекен кашни ачан çитĕнĕвĕ — сирĕн çитĕнÿ. Вăрттăнлăхĕ ăçта-ши?
— Нихăçан та ачасене ятлама тăрăшмастăп. Ятланин усси сахалрах. Ачана хавхалантарса тăрсан вара унăн малалла тăрăшас туйăмĕ те ÿсет.
— Эсир хатĕрленĕ ачасем чылай ăмăртура пулса кураççĕ. Кашнинчех тенĕ пек малти вырăнсене йышăнаççĕ. Чи пултаруллисене палăртма та кăмăллă пулĕ?
— Эдуард Иванов пĕлтĕр вĕренсе пĕтерчĕ. Питĕ маттур спортсмен. Çавăн пекех Юра Степанов, Андрей Артемьев, Ромăпа Женя Козловсем, Максим Анисимов, Саша Леонтьев, Степа Данилов, Женя Никифорова, Ульяна Данилова, Катя Николаева, Ирина Николаева та республикăри ăмăртусенче пĕрре мар палăрчĕç. Секцине çÿрекен хĕрачасен йышĕ те кулленех ÿсни савăнтарать. Акă, Аслă Чурачăк ялĕнчи хĕрачасем: Юля Егорова, Марина Новикова, Констанция Шикарева та хăнăхусене сиктермесĕр çÿреççĕ. Çак хĕрачасен çитĕнĕвĕсем те пур. Ю.Егорова республика ша-йĕнчи ăмăртура 52 килограмлисен хушшинче II-мĕш, К.Шикарева районта арçын ачасемпе тупăшса III-мĕш вырăн çĕнсе илчĕç. Маттур хĕрачасем малашне те çитĕнÿсемпе савăнтарасса шанатăп.
—Валерий Христанович, хальтерех иртнĕ ăмăртусем çинчен каласа параймăр-ши?
— Республика шайĕнчи ăмăрту Канаш районĕнче 1994—1996 çулсенче çуралнисем хушшинче иртрĕ. Тĕрлĕ виçесенче кĕрешсе хĕрачасем Венера Семенова (I-мĕш), Юлия Егорова (II-мĕш), Ульяна Данилова (III-мĕш), Инесса Ан- дреева (II-мĕш), Катя Нико- лаева (III-мĕш), Женя Никифорова (III-мĕш), Лилия Куракова (III-мĕш) вырăнсене çĕнсе илчĕç.
— Малашнехи тĕллевсем, ĕмĕтсем.
— Ăмăртусене хатĕрленетпĕр. Анчах кашнинчех пулса курма тÿр килмест. Çакă укçа-тенкĕпе çыхăннă. Хамăр районти кĕрешÿçĕсен йышĕ ÿсессе шанас килет. Хальлĕхе Асанкасси, Анат Тимĕрчкасси, Тăманлă Выçли, Аслă Чурачăк, Комсомольски, Тукай Мишер, Урмаел, Çĕнĕ Мăрат шкулĕсенче çеç ирĕклĕ майпа кĕрешекенсен секцийĕсем ĕçлеççĕ. Пĕлтĕр вĕсен йышне Чĕчкен тĕп шкулĕ хушăнчĕ. Кашни çулах йыш ÿссе пырсан, мĕнлерех лайăх пулмалла. Эпĕ хатĕрлекен ачасем малашне те тăрăшасса, Раççей, Европа шайĕнче палăрасса шанас килет. Тĕллев пулсан, ăнтăлсан вĕсем хăйсен ĕмĕтне пурнăçа кĕртеççех тесе шутлатăп эпĕ.
— Калаçушăн тавтапуç Сире! Ĕмĕтĕрсем пурнăçланса пыччăр.
Источник: "Каçал Ен"