11 июня 2008 г.
Чăваш Ен тĕп хули кăçалхи çĕртме уйăхĕн 1—5-мĕшĕсенче халăхсен хушшинчи патриотлăх туйăмне çĕклекен «Атăл чиккинче» I кинофестивале йышăнчĕ. Çак тапхăрта Шупашкарти пилĕк вырăнта 24 фильм кăтартнă, вĕсенчен илемлĕ фильмсем — 10, документлисем — 10, ачасем валли ÿкернисем — 4. Унсăр пуçне конкурса хутшăнманнисемпе те паллашма май килнĕ.
Июнĕн 5-мĕшĕнче кинофестиваль хупăннă май, çĕнтерÿçĕсене палăртнă, Гран-прие — «Чи лайăх фильм» ята тата «Ылтăн Анне» статуэткăна — «1612» ĕç тивĕçнĕ. Унăн режиссерĕ — Владимир Хотиненко. Фильма 2007 çулта ÿкернĕ. Асăннă режиссер «Илемлĕ фильмăн чи лайăх режиссури» номинацире те палăрнă. Тата тепĕр номинаципе — «Арçын рольне чи лайăх калăплакан» ята çамрăк актер Петр Кислов тивĕçнĕ.
Ытти фильм пирки те каласа кăтартмалли çук мар. Чи лайăх сценари номинаципе «Завтра идем в кино» (Польша), «Чи лайăх дебют» ята «Чаклун и Румба» (Беларуç), «Иккĕмĕш планри роль» ята Владимир Литвинов («Медвежья охота») çĕнсе илнĕ. «Фильмри чи лайăх музыкăшăн» номинацие «Пэрия» (Инди) фильм, «Чи лайăх оператор» ята Александр Демидов («Медвежья охота») тивĕçнĕ. Вĕсене те «Ылтăн Анне» статуэткăпа чысланă. Фестивалĕн Хисеплĕ дипломĕпе «Враги» фильма (сценари авторĕ тата режиссерĕ Мариа Можар) палăртса хăварнă. Документлă фильмсен конкурсĕ те çивĕч пулнă. Унта та сумлă ĕçсем «вăй виçнĕ». Жюри вара çак ĕçсене палăртнă: «Документлă фильмсенчен чи лайăххи» ята тата «Ылтăн Анне» парнене «Полк! Смирно!» ĕç тивĕçнĕ, режиссерĕ Борис Лизнев. Фестивалĕн Хисеплĕ дипломĕсемпе «Двое в городе», «Война матерей», «Блокада» ĕçсене палăртнă.
Кинофестивале савăнăçлă лару-тăрура хупнă май, ăна малашне мĕнлерех ирттерессипе сĕнÿ чылай пулнă. Çĕнтерÿçĕсене чыслама Чăваш патшалăх академи драма театрĕн сцени çине çĕршыври паллă актерсем тухнă. П.Винник, Л.Хитяева, Л.Лужина, Ю.Назаров, А.Голобородько актерсен ячĕсене кино куракансем лайăх пĕлеççĕ.
Çеçпĕл кинотеатр умĕнче «Киноçăлтăрсен фонтанĕн» чулне хывса хăварнă. Уява ЧР Президенчĕ Н.Федоров та хутшăннă. Çак патриотла кино ĕçне аталантарас тата халăх хушшинче сарас енĕпе тунă пархатарлă ĕçсемшĕн, çынна ăс-хакăл тĕлĕшпе воспитани панăшăн «Синемолайф» кинематографа пулăшу паракан тата аталантаракан фонд» коммерциллĕ мар общество организацийĕн председательне, О.Г.Урюмцева, Чăваш Республикин Хисеп грамотипе наградăланă. 2009 çулхи çĕртме уйăхĕн 1-мĕшĕнче фестивале II-мĕш хут ирттерĕç.
Источник: "Каçал Ен"