11 июня 2008 г.
Июнĕн 6-мĕшĕнче Шупашкарта, К.В.Иванов ячĕллĕ литература музейĕнче Денис Гордеев çыравçăн 70 çулхи юбилейне халалланă пултарулăх каçĕ иртнĕ. Унта тĕрлĕ çулхисем хутшăннă — юбиляр тусĕсем, библиотекарьсемпе вулакансем, çыравçăсемпе журналистсем, ученăйсемпе чиновниксем. Вĕренекен çамрăксем Денис Викторовича ăшшăн саламланă. Чăваш Республикин Президенчĕн Н.Федоровăн, культура, национальноçсен ĕçĕсен, информаци политикин тата архив ĕçĕсен министрĕн Р.Лизакован саламĕсене вуласа панă. Комсомольски район пуçлăхĕнчен, Мускаври тата ытти хуласенчи писательсенчен, ученăйсенчен, студентсенчен тата ыттисенчен телеграммăсем те çитнĕ. Писательсемпе поэтсем сăвăсем янратнă, юрланă. Герман Лебедев ячĕллĕ лицейре вĕренекенсем авторăн произведенийĕсенчи сыпăксемпе паллаштарнă. Пуçтарăннисем юбиляра ырлăх-сывлăх, пултарулăхра çĕнĕ ÿсĕмсем, «Улăп тăпри» тетралогие вĕçлеме ăнăçу суннă. Ĕçтешĕсем писателĕн хĕрĕ Света Гордеева та юлашки вăхăтра литература анинче паллă вырăн йышăннине палăртнă.
Источник: "Каçал Ен"