07 июня 2008 г.
«Çĕр тата çынсем» музейре тăтăшах тĕрлĕ мероприятисем иртеççĕ. Ÿкерчĕксен куравне çÿрекенсем те йышлă. Июнĕн 4-мĕшĕнче «Мир глазами детей» ÿкерчĕксен куравĕ уçăлчĕ. Савăнăçлă мероприятие район пуçлăхĕ Г.Ф.Волков, культура пайĕн ертÿçи В.С.Васильев, искусство шкулĕн директорĕ Ф.А.Гибатдинов уçрĕç. Ачасен ячĕпе ăшă сăмахсем каларĕç. Ÿкерчĕксем çулран-çул нумайланса пынине те палăртма кăмăллă. Ачасем ăсталанă ÿкерчĕксем тĕрлĕ темăпа пуян. Кунта вĕсен фантазийĕн вĕçĕ-хĕрри те çук. Г.Ф.Волков ÿкерчĕксемпе питĕ кăмăллă пулнине палăртрĕ. Районта çакăн пек пултаруллă ачасем çитĕнни паха. Ÿкерчĕксене тĕрлĕ номинаципе хакланă. Çĕнтерÿçĕсем район пуçлăхĕн Г.Ф.Волковăн призне тивĕçрĕç. Пултаруллă, çамрăк ÿнерçĕсене палăртса хăварни те вырăнлă пулĕ.
Гран-прие искусство шкулĕн вĕренекенĕ Светлана Семенова (ертÿçи И.А.Абдюшева) тивĕçрĕ. «Мама, папа, я — дружная семья» номинацире Ангелина Абдюшева (Комсомольски 1-мĕш вăтам шкулĕ) — 1-мĕш вырăнта. Урмаел вăтам шкулĕн вĕренекенĕсем Энже Алеевăпа Ранил Камальдинов — 2-мĕшпе 3-мĕш вырăнсенче. Елена Столярова, Екатерина Ятманова, Дмитрий Самуков, Татьяна Алексеева, Анастасия Андреева, Инна Шамбина илемлĕ ÿкер-чĕксемшĕн парнесене тивĕçрĕç. Марина Косова, Рина Басникова, Ринат Шарафутдинов, Анастасия Павлова, Екатерина Ахметова, Елена Салаева (Асанкасси вăтам шкулĕ), Динара Шакурова ĕçĕсене те палăртса хăварчĕç.
Вĕсен ĕçĕсемпе паллашас текенсене «Çĕр тата çынсем» музее çитсе курма чĕнетпĕр. Ачасем ÿкерчĕксенче хăйсен шухăш-кăмăлне туллин уçса панă.
Источник: "Каçал Ен"