31 мая 2008 г.
Пирĕн çĕршыври Санкт-Петербург хулинчи «Зенит» футбол команди Европăри футбол Кубокне çĕнсе илнине пăхса ларсан, футболистсем Кубока алра тытса мĕнле савăннине, телейлине курсан тата çĕршывра футбола юратакансемшĕн чăн-чăн пысăк уяв, савăнăç пулнине пăхсан, эпĕ те иртнĕ ĕмĕрти утмăлмĕш çулăн вĕçĕсене аса илтĕм. 1969 çулта пирĕн район команди Чăваш АССРĕнчи ДСО «Урожай» чемпионĕ ята тивĕçлĕ пулчĕ. Финала Çĕрпÿ, Улатăр, Хĕрлĕ Чутай тата пирĕн команда тухрĕ. Финал Çĕрпÿ хулинче иртрĕ.
Пĕрремĕш вăйăра эпир Хĕрлĕ Чутай командине 4:1 шутпа парăнтартăмăр. Çав кунах улатăрсем çĕрпÿсене çĕнтер-чĕç. Тепĕр кун финалта эпир Улатăр районĕн командипе выляма тивĕçлĕ пултăмăр. Эпир вăййа хатĕрленнĕ, анчах вĕсене çĕнтерессине питех ĕненмен, шанчăка та çухатман. Мĕншĕн тесен улатăрсен командинчи ăстасенчен чылайăшĕ хула командишĕн те вылянă. Вăл вăхăтра Улатăрăн тĕп команди республикăра та яланах малти вырăнсенче пулнă. Пирĕн командăра çамрăксем те чылайăнччĕ, Геннадий Драндров (Комсомольски), Иван Тимофеев (Хырай Ĕнел), Александр Ишмуратов (Комсомольски) вунсаккăр та тултарманччĕ. Аслăраххисем вара — Юрий Зубарев (Александровка), Василий Пундяков, Фирс Мамуткин пулнă. Пирĕн командăна Герольд Индюков ертсе пычĕ. Хальхи пек ас тăватăп, хĕрлĕчутайсене çĕнтернĕ хыççăн эпир апат çирĕмĕр те Çĕрпÿри йывăç хăна çуртне вырнаçрăмăр. Мĕншĕн тесен пире Çĕрпÿ хулине кайма районтан машина уйăрса паман, эпир унта рейс автобусĕпе çитнĕ. Улатăрсем вара автобус çине ларчĕç те Шупашкар хулине канма кайрĕç. Хăйсем вара комсомольскисене çĕнтеретпĕр тесе уççăнах каларĕç. Ун пек калама вĕсен сăлтавĕ те пулнă, мĕншĕн тесен республикăра ДСО «Урожай» чемпионне, Çĕрпÿ командине çĕнтернĕ.
Анчах та мечĕк çаврака. Мĕншĕн-ха пирĕн пĕтĕм вăя хурса тăрăшмалла мар; Çав кун çумăрлăрах çанталăкчĕ. Пирĕн çамрăксен вăй нумай, ывăнма та пĕлмеççĕ, ăсталăхĕ сахалтарах ĕнтĕ.
Вăйă пуçланчĕ. Малтанах шикленерех вылярĕç, анчах аслăраххисем пулăшса пычĕç, иккĕмĕш таймра питĕ ăста пулчĕç. Çак финалта эпир улатăрсене 2:0 шутпа çĕнтертĕмĕр, иккĕмĕш мечĕке Фирс Мамуткин тапса кĕртрĕ.
Вăйă хыççăн çав стадионрах пирĕн командăна республикăри ДСО «Урожай» представителĕ пăхăртан шăратса тунă, футболистпа мечĕкрен тăракан кубок пачĕ. Çак самантра пирĕнтен телейлĕ, савăнăçлă çын та пулмарĕ пулĕ.
Пирĕн аванах йывăр кубока тăван Комсомольскине илсе çитермелле, анчах автобус çине билет илме укçа та юлман. Ăна çĕклесе Çĕрпÿ хули урамĕпе утатпăр, почтăна кайса Комсомольскине шăнкăравласа укçа пирки ыйтасшăн. Урампа иртсе пынă чух садри панулмисене курсан, çамрăксем картаран çакăнса панулми татма пуçласшăнччĕ. Çав вăхăтра пĕр çăмăл машина чарăнчĕ те унтан чаплă тумланнă çынсем тухса, эпир камсем пулнине ыйтрĕç. Тĕплĕн ăнлантарса панă хыççăн вĕсем пирĕн çинчен Комсомольскине пĕлтерме пулчĕç. Вĕсенчен пĕри Çĕрпÿ райкомĕн пĕрремĕш секретарĕ пулнине пĕлтерчĕ, пире йĕркеллĕ çÿреме сĕнчĕ. Тепĕр сехет çурăран пирĕн районти спорткомитет председателĕ Б.Т.Кокорев тата П.Ф.Гладков мотоциклпа Çĕрпÿ хулине пырса автобуспа киле çитмелĕх укçа пачĕç.
Комсомольскине юрласа утса кĕтĕмĕр.
Тепĕр икĕ çул пирĕн район команди республика чысне хÿтĕлеме Раççейри зонăри ăмăртусене хутшăнма тивĕçлĕ пулчĕ. Пĕрремĕш çулне Арзамас хулинче, тепринче Ока çинчи Павлово-Посад хулинче вылярăмăр.
Хальхи вăхăтра çак пăхăр кубока çĕнсе илнĕ футболистсем тĕрлĕ çĕрте пурăнаççĕ. Шупашкарта, Комсомольски, Александровка, Нĕркеç, Кĕçĕн Каçал ялĕ-сенче тата ытти çĕрте те пурăнаççĕ. Шел пулин те вĕсемпе час-часах тĕл пулаймастпăр.
Район пуçлăхĕпе Г.Ф.Волковпа Шупашкарти ентешлĕх ертÿçи В.В.Туркай пĕр-пĕринпе калаçса ветерансем хушшинче районти стадионра е Шупашкарта юлташла тĕлпулу ирттерме пулăшасса шанатпăр. Иртнĕ çул Çĕнĕ Шупашкарăн çамрăк команди килнĕччĕ. Унта ветерансем питĕ сахалăн пулнăччĕ. Çавăнпа та тĕлпулу интереслех иртменччĕ.
Кăçал вара «Кубня», «Кĕтне» футбол командисен ветеранĕсем юлташла тĕлпулура вылĕç-ши; Геннадипе Герольд Драндровсем, Эдуард Попов, Юрипе Александр Ишмуратовсем, Юрий Зубарев, Владимир Краснов тата ыттисем çавăн пек тĕлпулушăн ĕмĕтленеççĕ.
Источник: "Каçал Ен"