31 мая 2008 г.
Нумаях пулмасть Правительство çурчĕн Пĕчĕк залĕнче 2008 çулта Республика Кунне хатĕрленсе ирттерес енĕпе ĕçлекен йĕркелÿ комитечĕн ларăвĕ пулнă.
Промышленноçпа энергетика министрĕн çумĕ Наталья Дмитриева тата Чăваш Республикин Суту-илÿпе промышленноç палатин президенчĕ Игорь Кустарин Раççейри «Раççей инновацийĕсене — Раççей капиталĕ» I форума мĕнле хатĕрленни çинчен пĕлтернĕ. Программăна 16 мероприяти кĕрет, çав шутра — стратеги конференцийĕ, çавра сĕтелсем, семинарсем, презентацисем, мастер-классем, куравсем. «Мega-Galaxy» культурăпа кану центрĕ тĕп площадка пулса тăрĕ. Форума чикĕ леш енчи çĕршывсен, Раççей регионĕсен делегацийĕсем, влаç органĕсен, вĕренÿ заведенийĕсен, предприятисемпе организацисен представителĕсем хутшăнаççĕ. «Раççей инновацийĕсене — Раççей капиталĕ» I форум ĕçне Раççей Федерацийĕн Президенчĕн Атăлçи федераци округĕнчи полномочиллĕ представителĕ Григорий Рапота хутшăнма палăртнă. Шупашкарти «Управлени. Экономика. Аталану» масштаблă экономика форумĕ Республика Кунĕн уяв программин курăмлă пулăмĕ пулĕ. Экономика аталанăвĕпе суту-илÿ министрĕ Иван Моторин пĕлтернĕ тăрăх, Интернет сетĕнче www.chebef.ru адреспа форум сайчĕ ĕçлет, Чăваш Республикин влаç орга-нĕсен официаллă порталĕнче баннер вырнаçтарнă. Унта пĕтĕм информацие пухнă. Шупашкарта ирттерме палăртнă форумпа чикĕ леш енчи патшалăхсен посолĕсем, экономика миссийĕсен пуçлăхĕсем, федераци субъекчĕсен представителĕсем, журналистсем питĕ кăсăкланаççĕ. Шупашкарти экономика форумĕн ĕçне Раççей Федерацийĕн регионсен аталанăвĕн министрĕ Дмитрий Козак, Раççей Перекет банкĕн Правленийĕн председателĕ Герман Греф, Раççей промышленникĕсемпе предпринимателĕсен союзĕн президенчĕ Александр Шохин хутшăнасса палăртнă. Форум вăхăтĕнче çавăн пекех йăлана кĕнĕ йĕркепе «Регионсем — чикĕсĕр çыхăнусем» курав иртет.
Республика Кунĕн анлă культура программине туса хатĕрленĕ. Чăваш Енре пурăнакансемпе хăнасем килĕштерекен «Раççей çăл куçĕсем» Пĕтĕм Раççейри халăх пултарулăхĕн фестивалĕпе, «Раççей маçтă-рĕсем» Пĕтĕм Раççейри декораципе прикладной искусство ăстисен япалисен конкурсĕпе пĕрле уяв кунĕсенче пуçласа «Раççей юррисем» Пĕтĕм Раççейри фестиваль-марафон иртет. Унта Надежда Бабкина тата «Вырăс юрри» ансамбль, фольклор коллективĕсем хутшăнаççĕ. Çакăн çинчен йĕркелÿ комитечĕн членĕсене ЧР культура, национальноçсен ĕçĕсен, информаци политикин тата архив ĕçĕн министрĕ Роза Лизакова пĕлтернĕ.
Ларура çавăн пекех социаллă пысăк пĕлтерĕшлĕ объект-сене хута ярассипе, Йĕпреçпе Муркаш районĕсенче Республика Кунне ирттерессипе, Чăваш Ен тĕп хулине уяв тĕлне илемлетессипе çыхăннă ыйтусене сÿтсе явнă.
Источник: "Каçал Ен"