24 мая 2008 г.
«АПК аталанăвĕ» наци проектне пурнăçласа районта чылай ĕç туса ирттереççĕ. Патшалăх ку тĕллевпе укçа-тенкĕ уйăрать. 2006 çулта çăмăллатнă кредитпа усă курса çĕршыври 1240 фермăна çĕнетнĕ. Вăл шутра пирĕн районти «Искра» колхозра та. Унта 200 пуç ĕне вырнаçмалăх фермăна хута янă.
Çак кунсенче районти ял хуçалăх предприятийĕсен ертÿçисем, выльăх-чĕрлĕх отраслĕнче ĕçлекен явалă специалистсем Хырай Ĕнелĕнчи сĕт-çу фермине çитсе курчĕç, паянхи кун ыйтăвне тивĕçтерекен технологипе паллашрĕç. Тĕлĕнмелли, малашне усă курмалли чылай пулчĕ. Ĕнесене МИКС-10 (ăна Германире туса кăларнă) кормосмеситель витĕр панă апат çитереççĕ. Выльăхсем ăна юратса кавлеççĕ. Вĕсене сăнчăрпа кăкарман, талăкĕпех ирĕкре çÿреççĕ. Апат çиеççĕ те, хăйсен вырăнне кĕрсе выртаççĕ. Тислĕкĕ вĕсем апат çинĕ çĕртех юлать. Транспортер каяшсене пуçтарса илсе тухать.
— Малтанлăха ĕнесем ятарласа хатĕрленĕ сăвăм пÿлĕмне кĕме шикленетчĕç. Вăхăт иртнĕ-çемĕн хăнăхрĕç. Пирĕн витресем çук. Сĕт тÿрех пăрăхсем тăрăх пĕр çĕре пуçтарăнать. 4 тонна вырнаçмалăх «SАС» (Данире туса кăларнă) сивĕтекен машина вынаçтарнă. Хуçалăх халĕ сĕте пысăк сортпа çеç сутать. Çĕнĕ технологипе усă курни тупăш калăпăшне ÿстерет,— терĕ В.П.Краснов председатель.
Выльăх-чĕрлĕх пăхакансен теориллĕ пайне район пуçлăхĕ Г.Ф.Волков уçрĕ, унăн çумĕ, ял хуçалăх пайĕн начальникĕ Г.М.Киргизов пĕтĕмлетрĕ. Иртнĕ çул районти хуçалăхсем ăнăçлă ĕçлесе пынă. Республика ша-йĕнче те малти пулнă. Кăçалхи виçĕ уйăх кăтартăвĕсемпе ял хуçалăх пайĕн тĕп зоотехникĕ К.Г.Гимальдинов сăмах илчĕ. Районти ветеринари станцийĕн начальникĕ Р.М.Велимухаметов ерекен чирсем çинче чарăнса тăчĕ, вĕсенчен асăрханмалли пирки каларĕ. Ăратлăх енĕпе ĕçлекен районти представитель Н.И.Емельянов кун пирки тĕплĕн чарăнса тăчĕ. Продуктивлăх ăратлăхран нумай килет. Патшалăх ку енĕпе укçа-тенкĕ чылай уйăрать.
«Искра» колхоз председателĕ В.П.Краснов «Новые агротехнологии» ООО ертÿçине В.В.Григорьева тав сăмахĕ каларĕ.
Источник: "Каçал Ен"