21 мая 2008 г.
Александровка ялĕнчи культура çуртне юрра-ташша ăста çынсем пухăнаççĕ. 2007 çулхи сентябрь уйăхĕнче ташă кружокĕ ĕçлеме пуçларĕ. Кружока таврари ялсенчи ачасем çÿреме кăмăллаççĕ. Т.Е.Иванова ачасене ташă ăсталăхне алла илме пулăшать. Кĕске вăхăтрах ачасем тĕрлĕ ташă вĕренчĕç. Хăйсен тăрăшулăхне пула “Сельский перепляс” конкурсра 3-мĕш вырăн йышăнчĕç.
Ачасен пултарулăхне аталантарас енĕпе чылай ĕçлетпĕр. Çавăнпа та тĕрлĕ ялсене концертпа тухса çÿретпĕр. Çĕнĕ Сĕнтĕр, Хырай Ĕнел, Нĕркеç, Хырхĕрри ялĕсенче пултăмăр. Унта пурăнакансем пире хапăлласах кĕтсе илчĕç. Çамрăк артистсене курма халăх йышлăн пухăнни те савăнтарчĕ. Тăманлă Выçли кирпĕч завочĕн ĕçченĕсем патĕнче те концертпа пултăмăр. Завод директорĕ В.М.Перьев хăнасене тав турĕ. Малашне те килсе çÿреме ыйтрĕ, ăнăçу сунчĕ. Пултаруллă артистсене ятранах асăнса хăварас килет. Любăпа Лена Пудовкинасем, Алена Зайцева, Алена Павлова, Юля Алексеева, Надя Петрушкина, Женя Лукина, Юля Кокшина, Наташа Воробьева, Самат Галляутдинов, Алена Куданова, Таня Михайлова, Настя Потапова, Ксения Буланкова, Юля Федорова, Аня Кокшина, Ирина Волкова сцена çинче пултаруллă та маттур. Вĕсем савăк юрăсем шăрантарчĕç, илемлĕ ташăсем парнелерĕç.
Артистсем малашне ытти ялсене те çитсе курма тĕллев лартнă. Ăнăçу сунатпăр вĕсене!
Источник: "Каçал Ен"