21 мая 2008 г.
«Комсомольски вăрман хуçалăхĕ» патшалăх учрежденийĕн мастерĕнче ĕçленĕ Анатолий Григорьевич Петров ултав çулĕ çине тăрса «пуйма» шутланă. Иртнĕ çулхи кĕркунне вăл акт-наряд тăратнă. Унта кăтартнă тăрăх, касса хатĕрленĕ йывăç 93 кубла метр пулнă. Çав шутран 8,16-шĕ — саккуна пăсса çырса хунăскер. Каярахпа бухгалтерире çак пая хăйне ĕç укçи шучĕпе памалласкер тесе приказ илме пултарать. Паха йышши материала 3264 тенкĕ сутса ярать. Анчах та вăрланă йывăçа илсе тухнă чухне «КамАЗ» автомашина çул хĕрринчи пысăк хыра çаклатать. А.Петров йĕре çухатас тесе, çĕр хутах ăна тĕпрен касса ярать. Çапла майпа 0,988 кубла метр хыр йывăççи 12639 тенкĕпе танлашса Шăмăршă вăрман хуçалăхне тăкак кÿрет.
Каснă йывăç электролини çине ÿксе проводасене сиенлетет. Çапла вара А.Петровпа унăн юлташĕсем йĕрке хуралçисен аллине лекеççĕ.
Район прокуратури судра А.Петровăн айăпне кăтартса пачĕ. Халĕ унăн 2 çул та 2 уйăх ирĕклĕхсĕр юлса условнăй майпа 2 çуллăх сăнав тапхăрне ирттермелле пулать.
Çавăн пекех унран 12639 тенкĕ укçан шыраса илме йышăннă.
.
Источник: "Каçал Ен"