17 мая 2008 г.
2008 çул — Раççейре Çемье çулталăкĕ. Районта та Çемье çулталăкне халалласа тăтăшах тĕрлĕ мероприяти йĕркелеççĕ. Акă, тĕп библиотекăра çемьесемпе тĕлпулу пулчĕ. Кунта амăшĕсемпе ачисем, асламăшĕ-аслашшĕсемпе мăнукĕсем пухăнчĕç. Савăнăçлă тĕл пулăва ача-пăча библиотекин заве- дующийĕ Г.Зайнуллина уçрĕ. Искусство шкулĕн вĕренекенĕсем илемлĕ ташă парнелерĕç. Т.Каримуллина, Н.Мельникова психологсем йĕркеленĕ ĕçсем те пуриншĕн те усăллă пулчĕç. Ачасемпе амăшĕсем, асламăшĕ-аслашшĕсем ĕçсене тăрăшса пурнăçларĕç. Хĕр ачасемпе арçын ачасем хăйсен пурнăçĕнчи чи илемлĕ те çутă куна ÿкерсе кăтартрĕç. Аслăраххисем çăлтăрсемпе çемье пурнăçне сăнларĕç. Кунта пурте тăрăшуллă та маттур пулнине палăртрĕç психологсем, пĕтĕмлетÿсемпе те паллаштарчĕç. Ачасем телейлĕ те тăнăç çемьере çитĕннине палăртрĕç. Апла пулсассăн ачасен пурнăçĕ çутă малашлăхпа çыхăннă.
Ачасем пирĕн пуласлăх, шанчăк. Анчах та тепĕр чухне вĕсем инкеке те лекме пултараççĕ. Уйрăмах çул вĕсемшĕн пысăк хăрушлăх кăларса тăратать. Çак темăпа районти шалти ĕçсен пайĕн ГИБДД инспекторĕ В.А.Кондратьев тухса калаçрĕ. Вăл çул çинчи правилăсене çирĕп пăхăнмалли пирки асăрхаттарчĕ, ачасемпе çыхăннă инкексем пирки те аса илчĕ. ”Ачасем инкеке лекнинче ашшĕ-амăшĕсен те айăпĕ пур. Вĕсем правилăсемпе паллаштармаççĕ”,— терĕ инспектор.
Пухăннисем тĕрлĕ вăйă вылярĕç. Кунта ачасем тавçăруллă та маттур пулнине палăртма кăмăллă. Вĕсем чылай кĕнеке вулаççĕ. Аслисем ачасене кĕнекепе туслаштарни те паха. Акă, Нина Степанова мăнукĕсемпе тăтăшах библиотекăна çÿрет. Вĕсем çемйипех кĕнеке вулама юратаççĕ. 2007 çул пĕтĕмлетĕвĕсемпе Степановсен çемйи чи нумай кĕнеке вуланă. Ача-пăча библиотеки Степановсене грамота парса чысларĕ.
Источник: "Каçал Ен"