17 мая 2008 г.
Райпо системинче ĕçленĕ вăрçă ветеранĕсем Çĕнтерÿ кунĕ ячĕпе ресторанта тĕлпулу ирттерчĕç. Ăна кĕске сăмах каласа райпо председателĕн кадрсем енĕпе ĕçлекен çумĕ Л.К.Кокшина уçрĕ, вăрçă ветеранĕсене уяв ячĕпе саламласа ырлăх-сывлăх сунчĕ.
Райпо совечĕн председателĕ Е.И.Карпеев сăмах илсе вăрçă ветеранĕсене кĕскен райпо ĕçĕ-хĕлĕпе паллаштарчĕ, çĕнтерÿçĕсене вăрçă хыççăн та активлă, тăрăшса ĕçленĕшĕн, çамрăксене воспитани парас ĕçре нумай вăй хунăшăн тав турĕ. «Аслă Çĕнтерĕвĕн пĕлтерĕшĕ çулсем иртнĕçемĕн чакмалла мар, Тăван çĕршывăн ирĕклĕхĕшĕн, унăн малашлăхĕшĕн пурнăçа шеллемесĕр çапăçнисене, çапăçура пуç хунисене эпир нихăçан та манмăпăр»,— терĕ вăл.
Вăрçă ветеранĕсене ресторанта ĕçлекенсем тутлă апат-çимĕçпе сăйларĕç.
Ветерансем тĕл пулура вăрçăн йывăр çулĕсене аса илчĕç, райпо правленине тĕл пулăва лайăх йĕркеленĕшĕн, вĕсене манманшăн тав турĕç.
Пухăннисем вăрçă тематикипе кĕвĕленĕ юрăсене юрларĕç. Çак ĕçе В.Кокшин музыкант йĕркелесе пычĕ.
Источник: "Каçал Ен"