17 мая 2008 г.
Районти 14 вăтам тата 5 тĕп шкул кăçалхи «Зарница» тата «Орленок» çарпа спорт вăййисене активлă хутшăнчĕç. Тĕрлĕ енлĕн ăмăртса çамрăк армеецсем ăс-тăн çивĕчлĕхне тĕрĕслерĕç, хăвăртлăха ÿстерчĕç, çаврăнăçулăха туптарĕç, яваплăха хăнăхрĕç. Çак вăйăсенче вăй виçме шкулсенче физкультура, ОБЖ учителĕсем ертсе пынипе ачасем чылай хатĕрленеççĕ. Ахальтен мар вырăссен паллă полководецĕ А.Суворов çапла каланă: «Вĕренÿре – йывăр, çапăçура — çăмăл». Маршпа харăссăн утасси çăмăл пек туйăнать хушăран. Анчах стройра пĕри йăнăшрĕ пулсан – ыттисен ĕçĕ харама кайни куçкĕрет. Çавăнпа та çак виçĕ кун пур шкул команди те «Пĕри – пуриншĕн, пурте – пĕриншĕн» девизпа пурăнчĕ. Çамрăк армеецсем ăнăçусемшĕн пĕрле савăнчĕç, йăнăшсемшĕн пăшăрханчĕç. Командирсен вырăнне хĕрсем йышăнни те сахалах мар. Çак черчен пикесенче мĕн чухлĕ вăй-хал, хастарлăх тапса тăрать.
«Сила, ловкость», «Защита», «Огневой рубеж», «Огневое троеборье» тата ытти тупăшусем çамрăксемшĕн уйрăмах интереслĕ. Хăвăрт чупма, противогазпа хÿтĕлев костюмĕ тăхăнма, пăшалтан тĕл пеме вĕсемшĕн йывăр пулмарĕ. Пушарниксен ĕç-хĕлне чухласси, çул çинчи хăрушсăрлăх правилисене пĕлесси вара пурин те кирлĕ шайра пулаймарĕ.
«Зарница» тата «Орленок» вăйăсене вĕçлесе командăсем строя тăчĕç. Пурте пăлхануллă самант çывхарнине туяççĕ. Кашниех ăмăрту пĕтĕмлетĕвĕсене хăвăртрах пĕлесшĕн. Район пуçлăхĕ Г.Ф.Волков, вĕрентÿ пайĕн начальникĕ Н.А.Максимов, районти çар комиссарĕ А.А.Маурин, РОСТО начальникĕ А.А.Абрамов, ГИБДД инспекторĕ В.А.Кондратьев тĕрлĕ ăмăртура мала тухнисене грамотăсемпе парнесем парса чысларĕç.
Вăтам шкулсенчен 1-мĕш вырăна Тăманлă Выçли шкулĕ йышăнчĕ. 2-мĕшне Хырай Ĕнел, 3-мĕшне Асанкасси вăтам шкулĕсем тивĕçрĕç. Тĕп шкулсенчен чи пултаруллисем – александровкăсем, Анат Тимĕрчкасси тата Чĕчкен шкулĕсен ачисем – иккĕмĕшпе виççĕмĕш вырăнсен хуçисем.
Район чысне хÿтĕлесе Тăманлă Выçли вăтам шкулĕн команди пĕлтĕрхи пекех рес- публикăра иртекен вăйăсене хутшăнĕ. Çĕнтерÿ вăй хумасăр, хăй тĕллĕн килмест. Çамрăк армеецсемпе физкультура учителĕ Евгений Григорьевич Басников тата ОБЖ вĕрентекен Юрий Николаевич Емельянов чылай тăрăшни куç умĕнчех.
Источник: "Каçал Ен"