14 мая 2008 г.
Майăн 9-мĕшĕнче, Шупашкарти «Олимпийский» стадионта хăвăрт утас енĕпе ХХIII Тĕнче кубокне савăнăçлă лару-тăрура уçнă. Унта çăмăл атлетсен Пĕтĕм тĕнчери ассоциацийĕн (ИААФ) президенчĕ Ламин Диак, ЧР Президенчĕ Николай Федоров, Çăмăл атлетикăн Пĕтĕм Раççейри Федерацийĕн президенчĕ Валентин Балахничев тата ытти официаллă çынсем спортсменсене саламласа ăнăçу суннă.
Майăн 10-мĕшĕнче хăвăрт утас енĕпе ХХIII Тĕнче Кубокне çĕнсе илессишĕн 11 тата 12 сехетре 10 километрлă, 13 сехетре арçынсем 20 километрлă дистанцие тухнă. Раççей спортсменĕ А.Барцайкин 10 километрлă дистанцие 39 минут та 57 секундра утса тухса тĕнче рекордне çĕнетнĕ, пĕрремĕш вырăн йышăннă. Иккĕмĕш вырăнта Китай спортсменĕ — Динг Чен. Раççейĕн тепĕр хăвăрт утаканĕ Д.Стрелков виççĕмĕш пулнă. Раççей спортсменĕсем иккĕшĕ те Мордва Республикинчен.
Хĕрсенчен вара юниорсем хушшинче пуринче те Раççей хĕрĕсем палăрнă. Т.Калмыкова — пĕрремĕш, Ирина Юманова (Чăваш Республики) — иккĕмĕш, Э.Алембекова виççĕмĕш пулнă.
Арçынсем хушшинче 20 километрлă дистанцие чи малтан Ф.Фернандес (Испани) вĕçленĕ. Иккĕмĕшпе виççĕмĕш вырăнсенче — В.Борчин (Раççей) тата Санчес (Мексика).
Çак дистанцирех хĕрарăмсенчен О.Каниськина чи пултарулли пулнă. Т.Сибилева финиша иккĕмĕш çитнĕ. Португалирен килнĕ Сантос — виççĕмĕш вырăнта.
Арçынсем 50 километрлă старта тухнă. Кунта та Раççей спортсменĕ Д.Нижегородов палăрнă, тĕнче рекордне çĕнетнĕ. В.Канайкин дистанцие иккĕмĕш вĕçленĕ. Виççĕмĕш вырăнта — Швазер (Итали).
Çапла вара Шупашкарта иртнĕ ăмăртура Раççей спортсменĕсен пуринчен те ытларах, 15 медаль. Мордва спортсменĕсем В.Борчин, И.Марков, Д.Нижегородов, В.Канайкин, О.Каниськина тата Чăваш Республикинчи Т.Сибилева Пекинри Олимпиадăна хутшăнма путевка çĕнсе илнĕ.
Майăн 11-мĕшĕнче Шупашкарта хăвăрт утакансен ХХIII Кубокне савăнăçлă лару-тăрура хупнă. ИААФ Президенчĕ Ламин Диак Шупашкарти ăмăртупа кăмăллă юлнă. «Питĕ чаплă иртрĕ. Эпир Тĕнче Кубокĕ çавăн пек иртессе кĕтмен. Йĕркелÿ питĕ пысăк пулчĕ. Чăваш Ене татах та килме хатĕр»,— палăртнă вăл. Ламин Дак ЧР Президентне Н.Федорова ăмăртусене пысăк шайра ирттерес енĕпе уйрăмах тăрăшнăшăн ылтăн медальпе наградăланă.
Шупашкар хулин пуçлăхĕ Николай Емельянов ИААФ ялавне Мексикăри Чиуауа хулине панă. Хăвăрт утас енĕпе ХХIV Тĕнче кубокĕ унта иртĕ.
Пĕтĕмпе Тĕнче кубокне 55 çĕршывран 480 яхăн спортсмен хутшăннă. Журналистсемпе хăнасем йышлăн килнĕ. Вĕсем хăйсене Чăваш Республикинче мĕнле йышăннипе кăмăллă пулнине пĕлтернĕ. Акă, хăшпĕр спортсменсен сăмахĕсем:
В.Канайкин: «Чăваш Ен правительствине тав тăватăп. Чăваш çĕрĕ çинче хама килти пек туятăп..».
Ф.Фернандес (Испани): «Шупашкар маншăн çитĕнÿсен хули».
.
Источник: "Каçал Ен"