14 мая 2008 г.
Майăн 8-мĕшĕнче Кремлĕн Пысăк керменĕнче Раççейĕн виççĕмĕш Президенчĕн инаугурацийĕ иртнĕ. Ку — Раççей историйĕнче патшалăхăн ĕçлекен пуçлăхĕ çĕнĕрен суйланнă Президента влаç панă пирвайхи тĕслĕх. Владимир Путин Президент постĕнчен кайрĕ, ку полномочисене 42 çулти Дмитрий Медведев йышăнчĕ. Вăл Раççейĕн юлашки 100 çул хушшинчи чи çамрăк лидерĕ пулса тăчĕ.
Инаугураци церемонийĕ пуçланнă май хисеплĕ хурал роти Кремль керменĕн Андрей залне РФ Патшалăх ялавне тата Президент штандартне йăтса кĕнĕ. Унтан — Раççей Конституцийĕн ятарлă «инаугураци» экзем-плярне, шăпах унпа патшалăх пуçлăхĕ тупа тăвать.
Церемоние Владимир Путин Президент килсе çитнĕ, Кремль коменданчĕн рапортне йышăннă. Вăл Кремль полкне, Хĕç-пăшаллă вăйсене службăшăн тав тунă.
Акă курантсен сассипе Дмитрий Медведев кĕрет, Кремль коменданчĕн рапортне йышăнать, Андрей залне кĕрет. Аллине Конституци çине хурса тупа тăвать...
Патшалăхăн çĕнĕ ертÿçи должноç йышăннă хыççăн унчченхи пуçлăх полномочийĕсем вĕçленеççĕ. Министрсен Кабинечĕн отставки хыççăн Президентăн икĕ эрнере парламентăн аялти палатине правительство председателĕн кандидатурине сĕнмелле. Ку хутĕнче вăл паллă ĕнтĕ — премьер ĕçне Владимир Путин кÿлĕннĕ.
Аса илтерер: кăçалхи пуш уйăхĕн 2-мĕшĕнче Дмитрий Медведев Президент суйлавĕнче шанчăклă çĕнтерчĕ. Унăн кандидатурине 4 парти сĕннĕ — «Пĕрлĕхлĕ Раççей», «Тĕрĕс-лĕхшĕн тăракан Раççей» партисем, Аграри партийĕ тата «Гражданла вăй» парти. Суйлавра Д.Медведевшăн суйлавçăсен 70,28 проценчĕ сасăланă.
Çĕнĕ Президентпа тĕплĕн-рех паллаштарни те вырăнлă. Вăл 1965 çулхи авăн уйăхĕн 14-мĕшĕнче Ленинградра çуралнă, Нева çинчи хулари патшалăх университечĕн юридици факультетне пĕтернĕ. Юридици наукисен кандидачĕ, доцент. Асăннă университетра преподаватель ĕçĕнче вăй хунă, Санкт-Петербург мэрийĕнче ĕçленĕ. 1999 çулта Раççей правительствин аппарачĕн ертÿçин çумĕ пулнă, унтан — Президент администрацийĕн ертÿçин çумĕ, пĕрремĕш çумĕ. 2003 çулхи юпа уйăхĕнчен — Президент администрацийĕн ертÿçи, 2005 çулхи чÿк уйăхĕнчен — РФ правительствин председателĕн пĕрремĕш çумĕ. Авланнă, ывăл çитĕнтерет.
ЧР Президенчĕ Николай Федоров та Мускавра Кремльте Дмитрий Медведев РФ Президенчĕн должноçне йышăннă ятпа ирттернĕ церемоние хутшăннă.
Источник: "Каçал Ен"