08 мая 2008 г.
Тăван çĕршывăн Аслă вăр-çин ветеранĕсен, тылра ĕçленĕ çынсен йышĕ çулсерен чакса пырать. Аслă Çĕнтерÿ пулнăранпа 63 çул çитрĕ. Майăн 9-мĕшĕ Раççей халăхĕшĕн паллă кун пулнă, пулать те. Кашни çемьенех пырса тивнĕ хаяр вăрçă, пурин те тенĕ пекех çывăх тăванĕ çапăçу хирĕнче пуçне хунă е сусăрланса таврăннă.
Пирĕн районтан Аслă Отечественнăй вăрçа 7 пин ытла çын тухса кайнă. 3,6 пинĕ вара каялла таврăнайман. Вăрçа 179 хĕрарăм хутшăннă.
Нумай-нумай салтак çапăçури паттăрлăхшăн орденсемпе медальсене тивĕçнĕ. Пирĕн районта çуралса ÿснĕ Константин Михайлович Антонов, Геннадий Габайдуллович Габайдуллин, Иван Андреевич Кабалин, Георгий Николаевич Чернов, Федор Николаевич Чернов Совет Союзĕн Геройĕ пулса тăнă.
Тыл ĕçченĕсем те алă усса ларман. Ачасем аслисемпе танах çĕнтерÿшĕн вăй хунă.
Çĕнтерĕве çывхартассишĕн вăй-халне шеллемен çынсем уяв кунĕнче чыс-хисепе тивĕçлĕ. Вĕсем умĕнче кашнинех пуç таймалла.
Источник: "Каçал Ен"