02 апреля 2008 г.
Çуркуннехи каникул вăхăтĕнче çулсеренех вĕрентÿ пайĕн профсоюз организацийĕ йĕркеленипе районти шкулсен коллективĕсем волейболла выляса ăмăртаççĕ. Учительсем çак вăййа кăмăллаççĕ. Ахальтен мар хăшпĕр шкулсем икшер команда тăратаççĕ. Хĕрарăмсен 7 ушкăнĕ Комсомольски 1-мĕш вăтам шкулĕн спортзалĕнче ăмăртрĕ. Çивĕч кĕрешÿре çак шкулăн команди мала тухрĕ. Иккĕмĕшпе виççĕмĕш вырăнсенче вара — Тăманлă Выçли тата Кĕçĕн Çĕрпÿел вăтам шкулĕсен командисем. Арçынсем Комсомольски 2-мĕш вăтам шкулĕнче тупăшрĕç. Çĕнтерÿçĕ ятне хуçасемех çĕнсе илме пултарчĕç. Призерсен шутне Комсомольски 1-мĕш, Нĕркеç вăтам шкулĕсен командисем кĕчĕç.
Хутăш командăсем кубокшăн Александровка тĕп шкулĕнче ăмăртрĕç. Ушкăнсенчен вуннăшĕ те ăсталăхпа, пултарулăхпа палăрчĕç. Апла пулин те вăйлисенчен вăйлисем те пур иккен. Хырхĕрри тĕп шкулĕн коллективĕ пĕрремĕш пулчĕ. Хырай Ĕнел, Çĕнĕ Мăрат вăтам шкулĕсем те — призерсем.
Мала тухнисене район администрацийĕн вĕрентÿ пайĕн начальникĕ Н.А.Максимов, профсоюз организацийĕн председателĕ А.А.Яковлев саламларĕç.
Источник: "Каçал Ен"