27 февраля 2018 г.
Февралĕн 23-мĕшĕнче Раççей çыннисем Тăван çĕршыв хỹтĕлевçин кунне паллă турĕç. Кăçал çак уяв ячĕпе виçĕ кун канса килентĕмĕр. Вĕсем вара тĕрлĕ мероприятипе пуян пулчĕç. Уйрăмах спорт ăмăртăвĕсем чылай иртрĕç.
Комсомольскинчи "Кĕтне" ФСК-ра февралĕн 23-мĕшĕнче арçынсем мини-футбол вăййинче тупăшнă. Ăмăртăва 17 команда хутшăннă. Чи маттуррисем вара çĕнтернĕ. Пĕрремĕш вырăна Комсомольски çамрăкĕсем çĕнсе илнĕ, иккĕмĕш вырăнта - "Чичканы" команда, виççĕмĕш - "Гигант".
Асанкассинче Г.Н.Рипанов ентеш ячĕпе волейбол турнирĕ йĕркеленĕ. Тăватă команда турнирта вăй виçнĕ. Тукай Мишер ял команди ăмăртура мала тухнă. Комсомольски 1-мĕш вăтам шкулĕ иккĕмĕш пулнă, Хирти Мăнтăрсем - виççĕмĕшсем.
Хирти Сĕнтĕр ял тăрăхĕнче Чечен вăрçинче пуçне хунă Иван Быкова асăнса мини-футбол турнирĕ иртнĕ. 21 команда мала тухассишĕн тупăшнă.
Канмалли кунсенче Нĕркеç ялĕнче Афган вăрçине хутшăннă Михаил Кузнецов парнисене çĕнсе илессишĕн хоккей ăмăртăвĕ йĕркеленĕ. Унта аслисемпе шкул ачисем хутшăннă. Хирти Сĕнтĕрте те хоккейла выляса тупăшнă.
Аслă Çĕрпỹел ял тăрăхĕнче те уяв кунĕсем мероприятисемпе пуян пулнă. Хирти Шăхасанта Чăваш Республикин тава тивĕçлĕ физкультура учителĕн Зинон Пантелеймонович Ивановăн парнисене çĕнсе илессишĕн йĕлтĕрпе чупса ăмăртнă. Вăтам тата тĕп шкулсен командисем, уйрăм çынсем старта тухнă. Пулă тытма кăмăллакансем вара кỹлĕ хĕррине пуçтарăннă. Ăна район депутачĕсен Пухăвĕн депутачĕ А.В.Тихонов пуçарнипе йĕркелеççĕ. Кăçал сивĕ çанталăка пăхмасăрах пулăçсем чăннипех те нумай пулнă. А.М.Кольцов, В.Г.Ильин, Л.Н.Казаков чи нумай пулă тытма пултарнă. Чи çамрăк пулă тытакансем Николай Казаковпа Максим Ильин пулнă. Вĕсем аслисенчен тĕслĕх илеççĕ. В.С.Михайлов вара - чи аслисенчен пĕри.
Ытти ял тăрăхĕсенче те уяв ячĕпе меропрятисем иртнĕ. Арçынсем тĕрлĕ ăмăртусенче, конкурссенче вăй виçнĕ. Йĕлтĕрпе ярăнса, хоккейла выляса тупăшнă. Каннă май вăхăта усăллă ирттерме те пĕлмелле.
Источник: "Каçал Ен"