16 февраля 2018 г.
Февралĕн 3-6-мĕшĕсенче Хусан хулинче тутар чĕлхипе тата литературипе иртнĕ олимпиадăра Чăваш Ен чысне Комсомольскипе Патăрьел районĕсен вĕренекенĕсем хỹтĕлерĕç. Унта Раççейĕн 20 регионĕнчен 105 ача хутшăннă.
Икĕ турпа иртнĕ олимпиадăра ачасен малтанах тутар чĕлхипе тата литературипе çыхăннă ыйтусене хуравлама тиврĕ, каярах вĕренекенсем паллă сăвăçăн, журналистăн тата публицистăн Роберт Миннуллинăн произведенине вуласа пачĕç.
9-10-мĕш классенче пĕлỹ илекен ачасем хушшинче тутар чĕлхипе иртнĕ олимпиадăра Чĕчкен тĕп тата Тукай Мишер вăтам шкулĕсен вĕренекенĕсем Лилия Галеевăпа Айсылу Зарипова çĕнтерỹçĕ ятне тивĕçрĕç. Комсомольски 2-мĕш вăтам шкулĕнче 11-мĕш класра вĕренекен Зиля Зейдуллина вара литературăна лайăх пĕлет. Пирĕн тăрăх чиперкки - олимпиада призерĕ.
Регион шайĕнче иртнĕ олимпиадăра мала тухнă ачасем кашниех Дипломсене тивĕçрĕç. Призерсемпе çĕнтерỹçĕсене хатĕрленĕ учительсене вара Тутар Республикин Вĕренỹпе ăслăлăх министерствин Хисеп грамотисемпе чысларĕç. Сăмах май каласан, регион шайĕнче мала тухнă ачасем апрелĕн 21-мĕшĕнче Пĕтĕм тĕнче шайĕнче иртекен 6-мĕш олимпиадăра Чăваш Ен чысне хỹтĕлĕç.
Р.МЕЗИТОВА,
Чĕчкен тĕп шкулĕн тутар чĕлхи вĕрентекенĕ.
Источник: "Каçал Ен"