13 февраля 2018 г.
Февралĕн 9-мĕшĕнче районта ĕçлĕ визитпа Чăваш Республикин Патшалăх Канашĕн председателĕ Валерий Филимонов пулчĕ. Вăл малтанах, вырăнти ĕç-хĕлпе паллашнă май, Урмаел ял тăрăхĕнче иртнĕ çул хута кайнă "Урмай" кинозала çитсе курчĕ. Сăмах май, "Единая Россия" парти проекчĕпе пурнăçланнă ĕçпе депутат питĕ кăмăллă.
Район администрацийĕн ларусен залĕнче иртнĕ канашлăва ял тăрăхĕсен тата участокри суйлав комиссийĕсен ертỹçисем хутшăнчĕç. Пĕрлехи ларăва район администрацийĕн пуçлăхĕ Александр Осипов ертсе пычĕ. Пуçлăх сумлă хăнана вырăнти ĕç-хĕлпе паллаштарчĕ, программăсене хутшăнса пурнăçланă проектсем пирки каласа пачĕ.
- Эпир "Единая Россия" парти программисене хутшăнса ял тăрăхĕн сăн-сăпатне çĕнетме пултартăмăр, сывă пурнăç йĕрки çине уйрăм тимлĕх уйăратпăр. Ахальтен мар ĕнтĕ пирĕн патăмăрта виçĕ хоккей коробки. Вĕсем пачах та пушă тăмаççĕ, унта час-часах турнирсем йĕркелетпĕр. Шкул ачисем те уроксем хыççăн кунта шайба хăвалама кăмăллаççĕ, - Хирти Сĕнтĕр ял тăрăхĕнче туса ирттернĕ ĕçсемпе Валентина Комарова паллаштарчĕ. - Сăмах май каласан, проектпа килĕшỹллĕн, паллах, конкурса хутшăнса тăван тăрăхри ялăм çутăллă та пулчĕ. Партие халăх пурнăçне çăмăллатма май паракан проектсемшĕн пысăк тав.
Александровка ял тăрăхĕнчи икĕ ялта - Хырай Ĕнелпе Александровкăра - 2017 çулта модуллĕ акушерпа фельдшер пункчĕсем хута кайни те маларах палăртнă парти проекчĕпе пурнăçланнăскерсемех. 2018 çулта Хырай Ĕнел ялĕнче клуб тума та палăртнă.
Лару вĕçĕнче "Единая Россия" партин хастар членĕсене - Елена Маштановăпа Олег Абросимова - Тав хучĕсем парса чысларĕç.
А.ИСАЕВА.
Источник: "Каçал Ен"