19 января 2018 г.
Раççей Федерацийĕн Тĕп суйлав комиссийĕ пĕлтернĕ тăрăх, кăрлачăн 17-мĕшĕ тĕлне суйлав умĕнхи кампание 17 кандидат хутшăнать. Вĕсенчен 15-шĕ сасă пухмалли процедурăна явăçаççĕ. Парламент партийĕсенчен тăратнă Владимир Жириновскипе (ЛДПР) Павел Грудинина (КПРФ) çак ĕçрен саккунпа килĕшỹллĕн хăтарнă. Хăйсем тĕллĕн кандидата тăнисенчен иккĕн - Владимир Путинпа Владимир Михайлов - сасă пухассипе тимлеççĕ.
Республика территорийĕнчи Ксения Собчакпа Григорий Явлинский штабĕсем кирлĕ чухлĕ çынна алă пустарнă. Вĕсем 2500-шер гражданин патне çитнĕ. Ĕçе малалла та тăсаççĕ. Ытти кандидатсен штабĕсем хăйсен хастарлăхĕпе палăрсах каймаççĕ-ха.
Кăрлачăн 17-мĕшĕнче Владимир Путин кандидатурине ырлакан обществăлла штаб хăйĕн пĕрремĕш организациллĕ ларăвне ирттернĕ. Пуçаруçăсем - виçĕ çумпредседатель. Владимир Путинăн шаннă çыннисем - И.Я.Яковлев ячĕллĕ Чăваш патшалăх педагогика университечĕн ректорĕ Владимир Николаевич Иванов тата Пĕтĕм Раççейри халăх фрончĕн регионти уйрăмĕн çумпредседателĕ, Чăваш патшалăх филармони директорĕ Николай Нилович Казаков пулнă. Виççĕмĕшĕ - Елена Владимировна Барсукова - Чăваш Енри медицина ассоциацийĕн Канашĕн председателĕ.
Вĕсем обществăлла организаци, пĕрлешỹ, юхăм лидерĕсене пĕрле ĕçлеме чĕннĕ. Çав йышра "Единая Россия" парти, Пĕтĕм Раççейри халăх фрончĕн представителĕсем, ветерансен тата çамрăксен организацийĕсем, профсоюзпа ытти обществăлла пĕрлешỹсем те пур.
Канашлăва хастар 30 общественникпа ертỹçĕ хутшăннă. Мероприятие штабăн çумпредседателĕ Владимир Николаевич Иванов уçнă. Вăл ĕçе йĕркелеме палăртнă виçĕ енпе - территоринче, отрасльте тата хыпарлавра - паллаштарнă. Пĕрремĕшĕ хастар тăрăшать. Республикăра Владимир Путина кандидата тăратассишĕн сасă пухассине пуçарнă. Çавăн пекех штаб халăха тĕрлĕ ыйтупа йышăнассине тата консультаци парассине йĕркелесшĕн. Иккĕмĕшĕ ĕç коллективĕсемпе тĕл пулусем ирттерессипе çыхăннă, çакăн тĕллевĕ - хальхи вăхăтра ĕçлекен Президента массăллă тĕрев парасси. Виççĕмĕшне, хыпарлава, агитаципе ăнлантару ĕçĕ, массăллă информаци хатĕрĕсемпе килĕштерсе ĕçлени кĕрет.
Сăмах илес текенсем нумайăн пулнă. Калаçакансем хушшинче ятарласа хут çине çырса килнисем пачах та пулманнине палăртма кăмăллă. Çынсем чăнахах та пĕлтерĕшлĕ шухăшсем пирки каланă. Информаци материалĕсем пуласси пирки кăсăкланнă. Лăпланса лармалла маррине, конкурентсем те çывăрманнине пĕлтернĕ. Хăш-пĕр çивĕч ыйтусене хускатнă. Тĕслĕхрен, нумай функциллĕ центр инçетре пулсан çынсене ăçта пулнине кура сасăлаттарма май туса парасси, уйрăмах çакă ялти ватăсемшĕн питĕ кансĕр. Çынсемпе курнăçнă чухне тулли информаци пулмалла. Лозунгсемпе чĕнỹсем никама та кирлĕ мар. Çакăнтах ытти обществăлла организацисемпе пĕрле ĕçлемелли темăсемпе майсене палăртнă.
Калаçу питĕ интереслĕ иртнĕ, çынсем яваплăха туйни тата тулли хăватпа ĕçлеме ха-тĕрри курăннă. Штаб çак адреспа вырнаçнă: Шупашкар хули, Калинин урамĕ, 80-В. 8(8352)37-52-20 телефон номерĕпе çыхăнма май пур. Кашни усăллă информаципе пуçарулăха пăхса тухаççĕ.
(ХАМĂР КОРР.).
Источник: "Каçал Ен"