01 декабря 2017 г.
РФ Пенси фончĕн республикăри уйрăмĕ пĕлтернĕ тăрăх, юлашки вăхăтра Интернетра СНИЛС номерне е паспорт кăтартăвĕсене тĕпе хурса патшалăхăн шутланман страховани фончĕсем тỹлекен укçа пуррине тĕрĕслемешкĕн пулăшу сĕнекен сайтсем вăй илнĕ.
Гражданинăн чи малтанах СНИЛС номерне е паспорт кăтартăвĕсене сайта кĕртмелле иккен, ун хыççăнах тỹлев сумми 100 пин тенке "çывхарать". Иккĕмĕш тапхăрта ултавçăсем нухрата клиентăн счетне самантрах куçарма шантарса ăна патшалăхăн шутланман страховщик кăтартăвĕсен базине кĕнишĕн укçа хывма ыйтаççĕ.
Çавна май асăннă служба граждансене çакнашкал сайтсене шута хумалла маррине тата харпăр хăйĕн кăтартăвĕ тĕлĕшпе тимлĕрех пулмаллине аса илтерет.
Пенси валли пухăнса пыракан укçа сумми пирки шанчăклă информацие РФ Пенси фончĕн сайтĕнче "Гражданинăн харпăр хăй кабинетĕнче", РФ Пенси фончĕн мобиллĕ хушăмĕнче тата патшалăх пулăшăвĕсен пĕрлехи порталĕнче кăна пĕлме май килет.
Источник: "Каçал Ен"