14 ноября 2017 г.
Раштав уйăхĕн 1-2-мĕшĕсенче "Шупашкар - Арена" пăр керменте спорт кĕрешĕвĕ енĕпе тĕнче кубокĕ иртĕ. Кавир çинче тĕнчери чи вăйлă хĕрарăм кĕрешỹçĕсем вăй виçĕç.
Кунта Раççей, Япони, Китай, АПШ, Азербайджан, Монголи, Швеци тата Украина спортсменĕсем хутшăнĕç. Пирĕн çĕршывăн пĕрлештернĕ командин капитанĕ пулма тĕнче чемпионачĕн призерне Ирина Ологоновăна (Буряти) шаннă. Хĕрарăмсен командин тĕп тренерĕ Юрий Шахмурадов пĕлтернĕ тăрăх - спортсменка операци хыççăн сывалса çитнĕ, Монголире иртнĕ сборсенче вăл лайăх хатĕрленнĕ. "Шел те, тĕрлĕ сăлтава пула Наталья Воробьева, Валерия Коблова тата Екатерина Букина тĕнче кубокне хутшăнаймĕç", - тенĕ вăл.
Аса илтеретпĕр: тĕнче кубокне 2001 çултанпа ирттереççĕ. Ытти çулсенче вăл Японире (5 хут), Францире (3 хут) тата Раççейре (2 хут - Красноярскра тата Санкт-Петербургра) иртнĕ. Кунашкал ăмăрту Чăваш Енре пĕрремĕш хут мар. 2012 çултанпа тĕрлĕ çĕршыв кĕрешỹçисем уçă ăмăртура Раççей кубокне çĕнсе илессишĕн тупăшаççĕ. Кăçал ку турнир раштав уйăхĕн 3-5-мĕшĕсенче "Шупашкар-Арена" керменте иртĕ.
Источник: "Каçал Ен"