10 ноября 2017 г.
Халăх пĕрлĕхĕн кунне Раççейре 2005 çултанпа паллă тăваççĕ. Историллĕ самантпа тачă çыхăннăскер 400 çул каяллах сăваплă шутланнă. Çавна май асăннă уява халалласа республикăри районсемпе хуласенче ноябрĕн 1-5-мĕшĕсенче тĕрлĕрен мероприяти иртнĕ.
Ноябрĕн 2-мĕшĕнче, уяв умĕн, Шупашкарти Хусанкай урамĕнче Халăхсен туслăх çуртне савăнăçлă лару-тăрура уçнă. Асăннă мероприятие Чăваш Республикин Пуçлăхĕ Михаил Игнатьев та хутшăннă.
- Паян уçăлакан Туслăх çурчĕ патшалăхăн наци культурипе çыхăннă программисене пурнăçа кĕртме, республикăри тĕрлĕ халăхăн туслăхĕпе çураçулăхне çирĕплетме, культурăпа кану мероприятийĕсене ирттерме пулăшĕ. Пурин валли те пĕр пек тивĕçлĕ условисем туса пама тăрăшрăмăр. Пирĕн тĕп тĕллев - халăхсене килĕшỹре, туслăхра, юратура пурăнтарасси. Туслăх çурчĕ вара çакна çирĕплетекен пĕр тĕслĕх, - тенĕ Михаил Васильевич, пурне те савăнăçлă самантпа саламланă май.
Çав кунах Халăхсен туслăх çуртĕнче çавра сĕтел мелĕпе тĕрлĕ калаçусем ирттернĕ, регионта патшалăх политикин, наци культурине пурнăçа кĕртессипе çыхăннă ыйтусене пăхса тухнă. Сăмах май, халăхсен представителĕсен вăйĕпе çитес çуркунне Туслăх паркне хывса хăварасшăн.
Источник: "Каçал Ен"