10 ноября 2017 г.
РФ ШĔМĕн муниципалитетсем хушшинчи "Комсомольский" уйрăмĕнчи административлă надзор уйрăмĕн инспекторĕ Гульназ Аглеметдиновна Хуснутдинова полици пайĕнче ĕçлеме пуçлани кăçалхи июнь уйăхĕнче шăп та лăп 20 çул çитрĕ.
Вăл 1978 çулта Тукай Мишер ялĕнче çут тĕнчене килнĕ. Милици ĕçĕ хĕрачасемшĕн ют пулмалла пек туйăнать те, хĕрпĕрчи ачаранах çак профессие ки-лĕштернĕ. Илемлĕ фильмсене курнă чухне те йĕркене пăсакансене пăркăчлакансем çинчен куçне илмен вăл. Гульназ чунĕ туртнипе, шалти ĕçсен пайне çул тытать. Ку 1997 çулта пулнă. Çав çултан çыхăнтарнă та ĕнтĕ пурнăçне Гульназ Аглеметдиновна йĕрке хуралçин ĕçĕпе. Малтан икĕ çул хĕр судпа айăплă тесе йышăннисен ĕç стажне шутланă çĕрте тăрăшнă, унтан ăна, тăрăшулăхне кура, паллах, канцелярие ертсе пыма шанаççĕ. Каярах, 2000 çулта, вăл - Куславккари ĕçлесе юсанмалли 5 номерлĕ колонин канцеляри начальникĕ.
Мал ĕмĕтлĕ те анлă тавракурăмлă çамрăк 2005 çулта Владимирти юридици институчĕн Хусанти филиалне куçăмсăр майпа вĕренсе пĕтернĕ. Хамăр района Гульназ Хуснутдинова 2008 çулта таврăннă. Аслă конвойра, каярах та çак енĕпех ĕçленĕ вăл. Хальхи вăхăтра Гульназ - муниципалитетсем хушшинчи "Комсомольский" уйрăмĕн административлă майпа айăплă тесе йышăннисемпе ĕçлекен инспекторĕ. Хăйĕн тивĕçне çанă тавăрса пурнăçласа пырать тесен те йăнăш пулмĕ.
Гульназ Хуснутдиновăна ĕçтешĕсем уçă, ырă кăмăллă та сăпайлă, яланах пулăшма хатĕр пулнишĕн хисеплеççĕ, тав туса ĕçре ăнăçу, телей-савăнăç сунаççĕ.
М.ФРОЛОВ,
полици начальникĕн çумĕ.
Источник: "Каçал Ен"