10 ноября 2017 г.
Чỹк уйăхĕн 2-мĕшĕнче Шупашкарти оперăпа балет театрĕнче Ял хуçалăхĕпе продукцие тирпейлекен промышленноçра тăрăшакансене халалланă савăнăçлă мероприяти иртнĕ. Уява пухăннă аграри ĕçченĕсене чăн малтанах Чăваш Республикин Пуçлăхĕ Михаил Игнатьев саламланă.
- Эпир сирĕнпе çураки вăхăтĕнче, ун хыççăн та сахал мар тĕл пулнă. Каярах пурсăмăра та тухăçа епле пухса кĕртмелли чылай шухăшлаттарчĕ, - тенĕ вăл ял хуçалăх ĕçченĕсене саламланă май.
Анчах та тăрăшни сая кайман, кăçалхи çитĕнỹсем пĕлтĕрхинчен те пысăкрах. Ку вара чун-чĕресене мăнаçлăх кỹме тивĕçлĕ. Паллах, маларах асăннă пулăм çак отрасле ăнланакан тата çĕре юратакан, унпа ĕçлеме пĕлекен паха специалистсем нумайланнипе те çыхăннă. Сăмахран, Комсомольски районнех илер. Кунти ĕçченсем çанталăк условийĕ кăларса тăратнă йывăрлăхсен умĕнче çухалса каймасăр пурĕ 39044 тонна (бункер виçипе) тыр-пул пухса кĕртме пултарнă, 1 гектартан тухакан вăтам тухăç вара 27,5 центнерпа танлашнă. Республика ертỹçи Михаил Игнатьев уявра ял çыннине пархатарлă ĕçĕшĕн чĕререн ăшшăн тав тунă. Производствăпа экономика кăтартăвĕсене ỹстернĕшĕн тата ĕçе пĕлсе йĕркеленĕшĕн Комсомольски районĕ иккĕмĕш вырăн çĕнсе илнине пĕлтернĕ. Çавна май район администрацийĕн пуçлăхне Александр Осипова I степеньлĕ Диплом парса чысланă.
Чăваш Республикин Министрсен Кабинечĕн Председателĕн çумĕ - ял хуçалăх министрĕ Сергей Артамонов ял хуçалăх тытăмĕнчи ĕç кăтартăвĕсемпе тĕплĕн паллаштарнă.
- Юлашки çирĕм çулта кун пек çитĕнỹ пачах пулман тесен те юрать. Пỹлмене 650 пин тонна тырă пухса кĕртме пултартăмăр, çĕрулми те тухăçĕпе савăнтарать. Сĕт-çу тирпейлессипе выльăх-чĕрлĕх ĕрчетессинче те ăнăçусемсĕр мар, - тенĕ министр хăйĕн докладĕнче.
Çăкăр çитĕнтерекенсен ĕçне хаклани чунтан савăнтарать, ку пулăм вĕсене татах та тăрăшма хистĕ. Эпир вара аграри ĕçченĕсене професси уявĕ ячĕпе ăшшăн саламлатпăр.
А.ИСАЕВА.
Источник: "Каçал Ен"