Публикации » Петровсем туслă, маттур

27 октября 2017 г.

Хырхĕрри ял тăрăхĕнче пурăнакан Петровсем - пултаруллă, ĕçчен те сăпайлă, юрра-ташша ăста çемье. Геннадий Николаевичпа Луиза Ивановна пушă вăхăта та яланах усăллă ирттерме тăрăшаççĕ. Çемье пуçĕ тĕрлĕ музыка инструменчĕсем ăсталать. Кил хуçи хĕрарăмĕ алă ĕçне кăмăллать. Вăл вырăнти "Палан" ушкăна çỹрет. Çак кунсенче Петровсен çемйи районти культура çуртĕнче иртнĕ республикăри пултаруллă çемьсен "Пурте туслă çемьерен!" фестивале хутшăнчĕ, хăйĕн пултарулăхĕпе туллин паллаштарчĕ. Вĕсем тăхăннă чăваш кĕписем епле илемлĕ! Фестивале хутшăнма Петровсене Михаил Бархонов культура ĕçченĕ хавхалантарнă. Çемье туслă та пултаруллă пулнине сцена çинче çирĕплетсе пачĕ.

В. КУРИЦЫНА.

Источник: "Каçал Ен"