27 октября 2017 г.
Чăваш Республикинчи çар комиссариачĕн Комсомольски тата Елчĕк районĕсенчи уйрăмĕнче тăрăшакансен халĕ хĕрỹ тапхăр - кĕркуннехи çар призывĕ пырать. Тăван çĕршыва чунтан парăннисем, кăмăлпа çирĕпписем çар ретне тăраççĕ. Кĕрхи призыв вăхăтĕнче районти 34 çамрăк салтак атти тăхăнма хатĕр.
Акă, октябрĕн 24-мĕшĕнче районти 10 яш çар тумĕ тăхăнчĕ те. Ильгиз Дильмухамедов, Сергей Петров, Никита Спиридонов, Федор Павлов, Игорь Петров, Станислав Паймулин, Ростислав Хлебников, Александр Павлов, Николай Кокшин, Дмитрий Абукин пирвайхи призывпа çула тухрĕç.
Вĕсене чи малтанах ЧР çар комиссариачĕн Комсомольски тата Елчĕк районĕсенчи уйрăмĕн начальникĕ Сергей Данилов инструктаж пачĕ:
- Эсир - çĕршыв хỹтĕлевçисем. Сумлă тивĕçе тỹрĕ кăмăлпа пурнăçласса шанатăп. Çирĕп кăмăллă, хастар, пуçаруллă пулăр.
Çавăн пекех военком салтак пурнăçĕпе, паянхи çарти ĕç-хĕлпе кĕскен паллаштарчĕ.
Çар ретне тăракансене телейлĕ çул пултăр.
А.ЕФРЕМОВА.
Источник: "Каçал Ен"