27 октября 2017 г.
- теççĕ юпа уйăхĕн 25-мĕшĕнче Урмаел ялĕн культура керменĕнче регионсем хушшинче иртнĕ "Янра, хуткупăс!" фестиваль-конкурса хутшăннă халăх инструменчĕсемпе вылякан коллективсен членĕсемпе уйрăм солистсем. Кунта Раççейĕн тĕрлĕ кĕтесĕсенчен килсе çитнĕ пултаруллă хуткупăсçăсемпе фольклор ушкăнĕсем малти вырăна тухассишĕн тупăшрĕç. Хуткупăспа баян, аккордеон, тута купăсĕпе балалайка, сĕрме купăс, курай, флейта... Мĕнле инструмент сасси кăна янăрамарĕ-ши çак кун вырăнти сцена çинче?!
Урмаелĕнчи культура керменĕн залĕ куракансемпе туп-тулли. Чăвашсемпе тутарсем, юнашарах мари халăх çыннисемпе вырăссем... Комсомольски çĕрĕ çинче иртекен фестивале Кабарда-Балкар Республикинчен те хăнасем килсе çитнĕ. Чĕмпĕр облаçĕпе Чулхула тăрăхĕсенчи, Шупашкар районĕнчи ансамбльсен ертỹçисем те инçе çула кĕс-кетсе "Янра, хуткупăс!" конкурса çитнĕ.
Вырăнти "Мишар" халăх фольклор ансамблĕ фестиваль-конкурса уçнă хыççăнах флэшмоб пулчĕ. Унтан сарлака сцена çине Тутарсан Республикинчи "Арча бизэклэре" халăх инструменчĕсен ансамблĕ тухрĕ. Аккордеон-баян кĕввипе сĕрме купăс сасси пĕрлешсен уява сăн кĕчĕ. Светланăпа Жамал Чеченовсен дуэчĕ вара пухăннисен куçĕ умне Эльбрус тăвĕсене кăларма хистерĕ. "Каçал" халăх фольклор ансамблĕн хуткупăсçисем купăсĕсене тăсса ярсан вара кашниех хускалчĕç, вĕсем вылякан кĕвĕ-çемĕ сарăлса юхнăçем, чун-чĕресене сăрхăнса кĕчĕ, уява чун кĕртрĕ. Çакна палăртмалла, хуткупăсçăсене пурте тăвăллăн алă çупса кĕтсе илчĕç, çаплах ăсатрĕç.
Ансамбльсем хăйсен ăсталăхĕпе тĕлĕнтернĕ хыççăн уйрăм солистсем пултарулăхĕсемпе паллаштарма тытăнчĕç. Сцена çине чăн малтан 8 çул та тултарман Урмаел ачи Радмир Хамбиков тухрĕ. Хуткупăсран кăшт пысăкрах арçын ача халăх инструментне парăнтарни - чăн-чăн тĕлĕнтермĕш! Тинрех çеç çак ăсталăха алла илме тытăннăскер кĕске вăхăтрах кĕвĕ-çемĕсем вĕреннĕ. Пултаруллăскер 1-мĕш вырăна тивĕçрĕ.
8-10 çулсенчи яшсем хушшинче Ильнар Зайнетдинов (Ульяновск хули), Рустам Васильев (Сĕнтĕрвăрри районĕ) тата Ильяз Хафизов (Шăнкăртам ялĕ) палăрчĕç.
10-12 çулхисем хушшинче Денис Герасимов (Елчĕк районĕ), Ранил Тазюков (Шăнкăртам ялĕ), Ксения Семенова (Комсомольски районĕ) мала тухрĕç.
Халăх инструменчĕсемпе вылякан ăстасене палăртма, чăнах та, питĕ йывăр, мĕншĕн тесен вĕсем пурте пултаруллă, талантлă. Малти вырăнсемпе палăрнă коллективсем асăнмалăх хаклă парнесене тивĕçрĕç. Кашни артиста Хисеп грамоти парса чысларĕç.
А.ИСАЕВА.
Источник: "Каçал Ен"