20 октября 2017 г.
Кăçалхи çанталăк ял çыннин чăтăмлăхне тĕрĕслес терĕ-ши? Утçи, вырма вăхăтĕнче йĕпе-сапа тăнине пула мĕн çитĕнтернине тăкаксăр пуçтарса илесси иккĕлентерчĕ. Каярах çанталăкĕ хресчене кăшт шеллерĕ пулас - уяртса ячĕ. Çакă вара уй-хирте ĕçлеме май пачĕ. Ĕçе пĕлсе йĕркеленĕ, техника енчен ăнăçлă хуçалăхсен хирĕсем пушанчĕç. Вĕсем çу каçа тар тăкса вăй хунă, çитĕнтернĕ культурăсене пухса кĕртнĕ, çĕр сухаланă. Чи хастаррисем - "Искра" тата "Урожай" колхозсен, "Асаново" ЯХПК ĕçченĕсем.
Сахăр кăшманне кăçал пирĕн районта икĕ хуçалăх - "Дружба" ЯХПК тата "Сюрбеево" ООО - çитĕнтернĕ. Пылак тымар çимĕçе хальлĕхе 47 гектар çинчен пуçтарса кĕртнĕ.
Хуçалăхсенче тăрăшсах çĕртме тăваççĕ. Октябрĕн 20-мĕшĕ тĕлне пурĕ 11493 гектар çĕр сухаланă.
612 гектар çинче çитĕннĕ кукурусран паха силос янтăланă та ĕнтĕ. Сăмах май каласан, ăна паянхи кун тĕлне районĕпе пурĕ 17154 тонна хатĕрленĕ.
Ăшă та тутлăхлă апат енчен пуян çу кунĕсем кая юлсах пыраççĕ. Умра вара - сивĕ хĕл. Октябрь уйăхĕ хальлĕхе аван тăрать-ха. Çавăнпа хуçалăхсен унпа туллин усă курмалла. Çитĕнтернĕ культурăсене юр айне хăварар мар!
Ш.ЗЕЙНУТДИНОВ,
тĕп агроном.
Источник: "Каçал Ен"