06 октября 2017 г.
Октябре кĕни кĕркуннен иккĕмĕш уйăхĕ çитнине кăна мар, çĕршывра кĕрхи призыв пуçланнине те пĕлтерет. Çавна май асăннă уйăхăн 2-мĕшĕнче Чăваш Республикин Комсомольскипе Елчĕк районĕсен çар комиссариатĕнче черетлĕ лару иртнĕ. Ăна район администрацийĕн пуçлăхĕ Александр Осипов ертсе пынă.
Мĕн авалтан çемьере ывăл ача çуралсан ăна çара кайма юрăхлă пултăр тесе пилленĕ. Ара, çара кайма юрăхлă тени сывлăх çирĕп пулнине пĕлтерекен пулăм-çке вăл. Комисси членĕсен тĕллевĕ вара - яш çара кайма юрăхлă е юрăхсăррине палăртасси, çара каяссине каяраха куçарасси.
Ларăва хутшăннисем 20 çамрăкăн ĕçĕсемпе паллашрĕç. Хастар та вĕри чĕреллĕ каччăсем салтака каймасан çĕршыва кам хỹтĕлĕ-ха? Пирĕн тăрăхри яшсем вара çавсен йышĕнчен, вĕсем çара кайма пачах хирĕç мар. Ку питĕ савăнтаракан пулăм.
Палăртса хăварам, 18-27 çул тултарнă яш-кĕрĕме çара кайма йыхравлакан хут килет. Кăçал Раççейĕпе пурĕ 134 пин çынна повестка тыттарма палăртнă пулсан, Чăваш Енрен - 1294 граждан. Вăтам е аслă професси пĕлĕвĕ илекен çамрăксем вара салтак аттине кăшт каярах тăхăнĕç. Вĕсене инçетре вырнаçнă çар чаçĕсене граждан авиаци тата çар самолечĕсемпе илсе çитерĕç.
А.ДЕНИСОВА.
Источник: "Каçал Ен"