12 сентября 2017 г.
Сентябрĕн 9-мĕшĕнче Шупашкар хулинчи "Энергия" стадионра "Советская Чувашия" хаçат Андриян Николаев космонавта асăнса йĕркелекен çăмăл атлетикăн çулленхи 79-мĕш эстафети иртнĕ.
Сумлă ăмăртăва 154 ушкăн хутшăннă. Ăна савăнăçлă лару-тăрура ЧР Пуçлăхĕ Михаил Игнатьев уçнă. Эстафетăра тупăшакансене саламланă май вăл юлашки çулсенче ăмăртăва халăх йышлă хутшăннине палăртнă.
Эстафета яланхиллех VIP-чупуран пуçланнă. Влаç органĕсенче вăй хуракансем, министерствăсемпе ведомство ертỹçисем, районсемпе хула пуçлăхĕсем, депутатсем 400 метрлă дистанцие чупса тухнă. Тĕрлĕ организаци ĕçченĕсем, вĕренỹ заведенийĕсенче пĕлỹ илекенсем, массăллă информаци хатĕрĕсенче тăрăшакансем, спортпа туслă çемьесем - пурте старта тăнă. Журналистсен хушшинче чи малтан финиша Наци радиовĕн корреспонденчĕсем çитнĕ. Наци телекуравĕн ĕçченĕсем - иккĕмĕш. Шупашкар районĕн "Тăван Ен" хаçат ĕçченĕсем вара 3-мĕш пулнă.
Комсомольски районĕн спортсменĕсем те эстафетăран айккинче юлман. Спортпа туслă çемье, вырăнти хăй тытăмлăх органĕнче ĕçлекенсем, ял тăрăхĕн ĕçченĕсем, шкул ачисем старта тухнă.
(ХАМĂР ИНФ.).
Источник: "Каçал Ен"