01 сентября 2017 г.
Иртнĕ эрнере кĕçнерникун хаçат редакцине çамрăк çын килсе кĕчĕ.
Хăйĕн нушипе мар, çынна пулăшас тĕллевпе. Леонид, арçынна çапла чĕнеççĕ, автомашинипе Комсомольскинчи чарăнуран Патăрьел районне утмăлтан иртнĕ арçынна лартса кайнă. Чăваш Ишек ялĕнче анса юлнăскерĕн салонта астма чирĕ чухне усă куракан аэрозолĕ ỹксе юлнă-мĕн. Леонид ỹркенсе тăман, Патăрьелтен "Каçал ен" редакцине килсе эмелĕн хуçине тупас тĕллевпе хаçата пĕлтерỹ парса хăварчĕ.
Мĕн тетĕр, çĕнĕ номер тухнă кунах хыпар кирлĕ çын патне çитнĕ. Аэрозоле çухатнă арçыннăн хĕрĕ тỹрех шăнкăравларĕ, эмел хуçи тупăнчĕ.
Çапла вара ырă кăмăллă Леонид тăрăшнипе тата "Каçал ен" хаçат пулăшнипе япала хăйĕн хуçине тупрĕ. Çакă пирĕн çынсем чунпа ырă пулнине тепĕр хут çирĕплетсе пачĕ.
Л.ГЕОРГИЕВА.
Источник: "Каçал Ен"