18 августа 2017 г.
Мĕн кăна пулса иртмест-ши пурнăçра?! 25 çулти хĕрарăма суд 30 сехет ĕçлеттерме йышăннă пулнă, анчах та çакскер административлă айăплава часрах татас та усаллине манас темен. Вăл суд приставĕсенчен тарса çỹреме пуçланă.
Пĕррехинче ĕçе кайнă чух суд приставĕсем айăпланнă хĕрарăма çул çинче асăрханă. Ун патне пырса ăна сăмах чĕнсен тата хăйсемпе паллаштарсан этем пуля пек айккине вĕçтернĕ. Суд приставĕсем те çухалса кайман - хыççăнах хăвалама пуçланă. Тахăш самантра хĕрарăм куçран йĕп пек çухалнă. Аякка кайман иккен, мĕскĕнскер - вĕлтĕрен ăшне çеç кĕрсе выртнă.
Палăртнă ĕçрен тарса çỹрекен хĕрарăм тĕлĕшпе суд приставĕсем йĕркене административлă майпа пăсни çинчен протокол çырнă. Комсомольски район сучĕ ăна 4 талăклăха хупма йышăннă.
В.ИВАНОВ.
Источник: "Каçал Ен"