18 августа 2017 г.
Хальхи вăхăтра Чăваш Республикин территорийĕнче сыснасен Африка мурĕ енĕпе карантин йĕркине пăрахăçланă. Çапах та, вăйра тăракан ветеринарипе санитари правилисемпе килĕшỹллĕн, эпизооти вучахĕнчи карантина пăрахăçланă хыççăн хăрушлăх енчен пĕрремĕш тата иккĕмĕш зонăра (пирĕн района пĕлтĕр шăпах унта кĕртнĕччĕ) 6 уйăха çак чарусем вăйра юлаççĕ:
- сыснасен какайне, ăш-чиккипе пуç-урине, енчен те вĕсене 70 градусран пысăкрах температурăра тытса сиенсĕрлетмен пулсан, иккĕмĕш хăрушлăх зонинчен турттарса тухма юрамасть;
- çак зонăсенче сыснасене сутма ирĕк çук;
- пĕрремĕш тата иккĕмĕш зонăсене кĕрекен территорисенче пурăнакансенчен сысна туянма юрамасть.
Çỹлерех асăннă чарусем сыхлăх енчен 3-4-мĕш компартментлă хуçалăхсене (сысна ĕрчетекен хупă йышши комплекссене) пырса тивмеççĕ.
Сунар хуçалăхĕн, çутçанталăкăн уйрăмах упракан территорийĕсенче хир сысни ĕрчетме тата урăх çĕртен илсе килме карантин йĕркине пăрахăçланăранпа 12 уйăх иртсен кăна ирĕк параççĕ.
Комсомольски районĕ 2017 çулхи июлĕн 26-мĕшĕнчен сыснасен Африка мурĕнчен ирĕклĕ шутланать. Çавна май пирĕн тăрăхра çав чирпе çыхăннă чарусемпе чăрмавсене те пăрахăçланă.
С.ВАСИЛЬЕВ,
районти ветстанцин тĕп врачĕ.
Источник: "Каçал Ен"