18 августа 2017 г.
Комсомольски райповĕ - районти чи пысăк предприятисенчен пĕри. Ун тытăмĕнче 300 çын ытла тăрăшать. Юлашки çирĕм ытла çулта райпо коллективĕ епле ĕçлесе пынине пирĕн тăрăхра пурăнакансем аван пĕлеççĕ ĕнтĕ. Пурлăхпа техника никĕсне çирĕплетнипе пĕрлех хушма ĕç вырăнĕсем тунă, пур объектсене тĕпрен юсаса çĕнĕ сăн-сăпат кĕртнĕ, вĕсенче сутуçăсем валли те, тавар туянакансемшĕн те пĕтĕм услови пултăр тесе тĕллевлĕн ĕçленĕ. Тавар сутнисĕр тата обществăлла апатлану енĕпе ĕçленисĕр пуçне районта пурăнакансенчен сĕт, пахча çимĕç, эмел курăкĕсем туянассине аван йĕркеленĕ. Ĕç вырăнĕсене автоматизациленĕ. Нумай енĕпе райпо коллективĕн кăтартăвĕсем Чăваш Республикинче те чи лайăххисем. Ахальтен мар республика, Раççей шайĕнчи кооператорсен семинар-канашлăвĕсене Комсомольски çĕрĕ час-часах йышăннă...
Паллах, тата нумай асăнса кайма пулать райпон ỹсĕмĕсемпе çитĕнĕвĕсене, анчах хамăн сăмаха паян мĕншĕн шăпах çак сфера çинчен пуçарнине ăнлантарма та вăхăт пуль. Августăн 17-мĕшĕнче Комсомольски райповĕн уполномоченнăй пайщикĕсен черетсĕр пухăвĕ иртрĕ. Кун йĕркинчи тĕп ыйтусем райпо совечĕн председателĕ ĕçрен хăтарма ыйтса çырнине пăхса тухасси тата çĕнĕ ертỹçĕ суйласси пулчĕç. Малтанах Евгений Карпеев потребительсен пĕрлешĕвĕн хыçа юлнă пилĕк çулти ĕç-хĕлĕпе паллаштарчĕ. Чăвашпотребсоюз председателĕ Валерий Павлов комсомольскисен новаторла шухăшĕсене Чăваш Енри ытти организацисем те хаваспах йышăннине, хăйсем патĕнче пурнăçа кĕртнине палăртрĕ. "Пĕтĕм çитĕнỹсемпе ỹсĕмсен сăлтавĕ - коллектива Евгений Иванович 26 çул пĕр улшăнмасăр ăнăçлă ертсе пынинче, ĕçченсем пĕр-пĕрне ăнланма, итлеме пĕлнинче, лартнă тĕллеве пурнăçлас енĕпе пĕр шухăшлăн ĕçленинче", - терĕ вăл хăй сăмахĕнче. Чăвашпотребсоюзăн профсоюз ертỹçи Надежда Гамоля Комсомольски райповĕнче ĕçпе юнашарах кану та пынине, çынсен сывлăхĕ çине пысăк тимлĕх уйăрнине те уйрăммăн палăртрĕ.
Уполномоченнăй пайщиксен черетсĕр пухăвĕнче Евгений Карпеевăн Комсомольски райпо совечĕн председателĕн ĕçĕнчен хăтарма ыйтса çырнине тивĕçтерме йышăнчĕç. Евгений Ивановича нумай çул тивĕçлĕ ĕçлесе пынăшăн тав турĕç, Тав хучĕсемпе, асăнмалăх парнесемпе чысларĕç.
Райпо коллективне малашне ертсе пыма пĕр саслă пулса Людмила Сорокинана суйларĕç, ăна пурнăç уттинчен кая юлмасăр ĕçлеме сунса хăварчĕç.
Л.ШУРЯШКИНА.
Источник: "Каçал Ен"