15 августа 2017 г.
Августăн 10-мĕшĕнче район администрацийĕн ларусен залĕнче ĕç, çар, вăрçă, право органĕсен ветеранĕсен черетлĕ ларăвĕ иртрĕ. Унта президиум членĕсемсĕр пуçне пуçламăш организацисенчи ветерансен совечĕсен председателĕсем тата районти ытти обществăлла организацисен ертỹçисем хутшăнчĕç.
Пухăннисем мероприяти пуçланиччен тинрех çеç пурнăçран уйрăлса кайнă Таисия Красновăна хисеплесе пĕр минут шăп тăчĕç. Вăл "Промкерамика" предприятинчи ветерансен совечĕсен председателĕнче 30 çул ытла тăрăшнă.
"Пенсионерсемпе ветерансене пирвайхи пулăшупа тивĕçтересси" докладпа район больницин тĕп врачĕн çумĕ Инна Ефремова паллаштарчĕ. Пенси фончĕн начальникĕ Ирина Белобаева вара пенсипе тивĕçтерес йĕрке çинчен каласа пачĕ, кашнине кăсăклантаракан ыйтусем çине хуравларĕ.
Анлă ларăва хутшăннисем пăшăрхантаракан ыйтусене сỹтсе яврĕç, малашне туса ирттермелли ĕçсене планларĕç. Çавăн пекех канашлăва хутшăннисем пĕр саслă пулса Хырай Ĕнел ялĕн ваттисен канашĕн председательне Людмила Макаровăна районти ветерансен совечĕн президиум членне суйларĕç.
Ветерансен юхăмне активлă хутшăнакансене - Антонина Васильевăна, Валентина Яковлевăна, Василий Пундякова, Клавдия Жестянкинана, Людмила Кокшинана, Людмила Бариновăна - Хисеп грамотисем парса чысларĕç, ячĕсене Хисеп кĕнеки çине çырса хучĕç.
Ю.ТИМОФЕЕВ.
Источник: "Каçал Ен"