11 августа 2017 г.
Пограничниксен çарне туса хунăранпа 2018 çулта 100 çул çитет. РСФСР Совнаркомĕн 1918 çулхи майăн 28-мĕшĕнчи декречĕпе килĕшỹллĕн, СССР патшалăх хăрушсăрлăх комитечĕн чикĕ хуралĕн çарне çĕршывăн тип çĕр тата шыв çинчи чиккисене сыхлама йĕркеленĕ.
Пирĕн районта çуралса ỹснĕ пилĕкçĕре яхăн арçын салтакра симĕс карттуспа çỹреме тивĕçнĕ. Вĕсем Инçет Хĕвелтухăçĕнчен пуçласа Хĕвеланăç таранах çĕр çинче те, тинĕс-океансенче те çĕршыв хăрушсăрлăхне упранă. Паллах, çарта çуралнă туслăх - чи çирĕппи. Ăна упрас, çамрăксене патриотла воспитани пама хутшăнас тĕллевпе чикĕ хуралĕн ветеранĕсем пуçтарăнса республикăри "Пограничниксен тăванлăхĕ" обществăлла организацин районти уйрăмне йĕркелесе янă. Йĕркеленнĕренпе виçĕ çул çеç пулин те, чылай ырă ĕç тума ĕлкĕрнĕ тăванлăх. Чи сумли, курăмли вара - чикĕ хуралĕн ветеранĕсен ячĕпе район центрĕнче (2015 ç.) тата Вутлан ялĕнче (2016 ç.) палăксем лартни. Унсăр пуçне, Аслă Отечественнăй вăрçăра хыпарсăр çухалнă ентешсем çинчен Павел Зайцев пуçтарса хатĕрленĕ "Память" кĕнекене кăларма спонсорла пулăшу панă. Анатолий Терентьев председатель тата унăн çумĕ Геннадий Филиппов пуçарнипе иккĕмĕш çул ĕнтĕ Комсомольскинчи вăрман уçланкинче спорт турнирĕ иртет. Ытти районсенче пулакан ăмăртусене йыхрав илсен ветеран-пограничниксем команда пуçтарса хаваспах тупăшусене хутшăнаççĕ. Вĕсенчен яланах малти вырăнсем йышăнса таврăнаççĕ. Час-часах шкул ачисемпе тĕл пулса паттăрлăх урокĕсенче çарти йĕрке, арçыннăн çĕршыв умĕнчи таса тивĕçĕ çинчен куçа-куçăн калаçаççĕ. Çĕнĕ Мăрат вăтам шкулĕнче Чечен Республикинче пуçне хунă Леонид Борисова асăнса çулсерен йĕркелекен волейбол турнирĕ те вĕсемсĕр иртмест.
"Каçал ен" хаçат редакцийĕпе те туслă çыхăну тытаççĕ ĕнерхи чикĕ хуралçисем. Эпир ирттерекен çăмăл атлетика, йĕл-тĕрпе чупакансен эстафетисенче пултарнă таран пулăшаççĕ.
"Пограничниксен тăванлăхĕ" пĕрлешĕвĕн районти уйрăмĕ пограничниксен çарне туса хунăранпа пĕр ĕмĕр çитнĕ кун тĕлне кĕнеке кăларма тĕллев лартнă. Унта çĕршыв чиккисене сыхланă кашни ентеш çинчен çырса кăтартасшăн. Материалсем пуçтарас ĕç хĕллеренпех пырать. Анчах пурте хăйсем çинчен пĕлтерме васкамаççĕ-ха. Анатолий Семеновичпа Геннадий Николаевич ветеран-пограничниксене хастартарах пулма ыйтаççĕ. Ара, материал пуçтарасси вăраха кайсан кĕнеке вăхăтра кун çути кураймĕ е тухайсан та унта пурин çинчен те информаци пулмĕ.
- Хăвăр çинчен пĕлтерсе кĕске биографи, салтакри сăн-ỹкерчĕк, службăра пулнă вырăн, наградăсем пирки çырнине хальтерех пире çитерсе пама тăрăшсамăр. Кĕнеке - ĕмĕрлĕх япала, ăна эсир çеç мар, сирĕн ачăрсем те, мăнукăрсем те тытса вуласа мăнаçланма пултараççĕ, - терĕç пуçаруçăсем.
Тĕплĕнрех ыйтса пĕлме телефонĕсене те çырса хăварам. 8-960-300-38-05 - Анатолий Терентьев, 8-927-853-53-83 - Геннадий Филиппов. Паян тумалли ĕçе ырана ан хăварăр. Çак ĕçре пограничниксен тăванĕсем те пулăшма пултараççĕ.
Л.ШУРЯШКИНА.
Источник: "Каçал Ен"