28 июля 2017 г.
Районти ял хуçалăх предприятийĕсемпе колхозсен, фермер хуçалăхĕсен ĕçченĕсем хальхи вăхăтра выльăх-чĕрлĕхе хĕл кунĕсенче тăрантарма кирлĕ таран апат янтăласа хăварас тата вырма ĕçĕсене пурнăçлас енĕпе тимлеççĕ.
- Çанталăк условийĕсене пула кăçал выльăх апачĕ хатĕрлесси, тыр-пула пухса кĕртесси каярах юлчĕ. Апла пулин те эпир хамăр ума çирĕп тĕллев лартнă: умри йывăрлăхсене пăхмасăр, уй-хирти пуянлăха çухатусăр пухса кĕртмелле. Паянхи кун "Восток" ЯХПК ĕçченĕсем нумай çул ỹсекен курăк уйĕнче тар тăкаççĕ, - вырăнти ĕç-хĕлпе паллаштарчĕ ял хуçалăх производство кооперативĕн ертỹçи Валерий Михеев.
Хуçалăхăн сухаласа акăнакан çĕр 1463 гектарпа танлашать. Ун çинче кунти ĕçченсем нумай çул ỹсекен курăкпа кукуруза тата пĕрчĕллĕ культурăсем акаççĕ. Çаран лаптăкĕ 190 гектар пулсан, нумай çул ỹсекен курăксен - 300 гектар. Паянхи кун тĕлне хуçалăх 2000 тоннăна яхăн сенажпа силос хывма ĕлкĕрнĕ. Утă пирки калас пулсан, ăна 200 тоннăна яхăн типĕтсе кĕртнĕ. Хальхи вăхăтра ĕçченсем нумай çул ỹсекен курăк ани çинче тимлеççĕ. Нимĕçсем кăларнă "Морал" комбайнпа Юрий Белков çулнă курăка Роберт Белков, Викентий Ятманов, Николай Хлебников водительсем фермăна турттараççĕ. Сенаж пусăрăнтарнă çĕрте те ĕç аван пырать.
А.ДЕНИСОВА.
Источник: "Каçал Ен"