21 июля 2017 г.
Июлĕн 22-мĕшĕнче Раççейри суту-илỹ ĕçченĕсем хăйсен професси уявне паллă тăваççĕ. Çавна май ĕçре маттур та тăрăшуллă сутуçăсене палăртса хăварни вырăнлă. Сăмах май каласан, вĕсем Комсомольски райповĕнче сахал мар.
Тĕслĕхрен, асăннă тытăмăн Хырай Ĕнелĕнчи куллен кирлĕ таварсен лавккинех илер. Кунта ĕçе чунтан парăннă сутуçăсем тăрăшаççĕ.
- Альбина Александровăпа Ольга Кабалина тавар туянакансемпе яланах ăшшăн калаçаççĕ, сĕнỹ-канашпа та пулăшаççĕ, - теççĕ вĕсем пирки ял çыннисем. - Ахальтен мар пирĕн лавккана таврари ялсенчен те тавар туянма килсех çỹреççĕ. Стройматериалсемпе пысăк япаласем илес кăмăллисен ĕмĕчĕсене те туллин пурнăçлаççĕ, çакăн евĕр таварсене хапха умнех çитерсе параççĕ.
Чăнах та, асăннă лавккан сентрисем çинче паянхи кун халăх ыйтăвне тивĕçтерекен апат-çимĕç, ытти тавар та çителĕклех. Альбина Николаевнăпа Ольга Николаевна кунсерен вун-вун çын ыйтăвне тивĕçтереççĕ, кашни килен-каянах паха тавар сĕнеççĕ. Альбина Александрова райпо тытăмĕнче 18 çул тăрăшать, Ольга Кабалина вара асăннă лавккара 8 çул тỹрĕ кăмăлпа хăйне шаннă ĕçе пурнăçлать.
Альбина Николаевна пирки калас пулсан, ăна вăтам шкул пĕтернĕ хыççăнах ялти культура çурчĕн директорĕ пулма сĕнеççĕ. Кунта вăл 4 çул тăрăшать. Унтан çыхăну уйрăмне почтальонкăна вырнаçать те кашни кунах ял çыннисене хаçат-журнал валеçет, çав вăхăтрах çырусем салатать, пенсипе, ытти тỹлевсемпе те тивĕçтерет.
- Ялта çĕнĕ лавкка уçăлчĕ, анчах та ĕçлес кăмăллисем темшĕн тупăнмарĕç. Вара мана сутуçă пулма сĕнчĕç, эпĕ килĕшрĕм. Хама шаннă ĕçе тỹрĕ кăмăлпа 18 çул пурнăçлатăп, - терĕ куллен кирлĕ таварсен лавккин заведующийĕ Альбина Александрова.
Маттур та хастар ĕçчене ĕçри пултарулăхпа тăрăшулăхшăн пĕрре мар Чăвашпотребсоюзăн Хисеп грамотисемпе наградăланă, унăн Тав хучĕсемпе паллăсем те çителĕклех. Харсăр ĕçчен çумĕнче тăрăшакан Ольга Николаевна та, ертỹçĕ евĕрех, хастар та тăрăшуллă. Коопераци ĕçченĕсен кунĕнче вара Ольга Кабалина та Чăвашпотребсоюзăн Хисеп грамотине тивĕçрĕ.
А.ИСАЕВА.
Источник: "Каçал Ен"