18 июля 2017 г.
"Слава картофелю" агрофирмăра Уй-хир кунне çулсеренех ирттереççĕ. Акă кăçал та, июлĕн 14-мĕшĕнче, Раççейĕн тĕрлĕ регионĕсенчен килсе çитнĕ хăнасем çĕрулми туса илес опытпа паллашрĕç, çав вăхăтрах "иккĕмĕш çăкăр" çитĕнекен уйсене те çитсе курчĕç.
Уй-хир кунне "Слава картофелю" агрофирмăн генеральнăй директорĕ Хасиятулла Идиатуллин уçрĕ. Вăл семинар тĕллевĕпе тата килсе çитнĕ хăнасемпе паллаштарчĕ. Чăваш Республикин ял хуçалăх министрĕн çумĕ Надежда Гладкова, район администрацийĕн пуçлăхĕн çумĕ Александр Краснов, "АСК" ОООн соучредителĕ Александр Капитонов семинара хутшăнакансене уявпа саламларĕç, кашнинех тухăçлă кун сунчĕç.
Чи малтанах ĕçлĕ ушкăн Канаш районне кĕрекен Сиккасси ялне çул тытрĕ. "Кунта агрофирмăн 129 гектар çĕр пур. Вĕсенчен 25 гектарĕ çинче фацели ятлă культурăна сидератлă удобренилĕх çитĕнтеретпĕр. Килес çул çак уйра "Невский" тата "Ред Скарлетт" сортсен пĕчĕк çеç улмисене (мини клубни) лартăпăр. Палăртса хăварам, вăрлăхсене малтанах пробиркăсенче вăй илтертĕмĕр, каярах вара 33 пин авăра 24 теплицăна куçарса лартрăмăр", - терĕ "АСК" ООО агрономĕ Светлана Филиппова.
Çак уйра лартнă "Ред Скарлетт", "Импала", "Невский", "Жуковский" сортсем шап-шурă чечекре. Йăранĕсем çинчен куçа та илес килмест: вĕсем тип-тикĕс те ем-ешĕл.
- Çумкурăкпа кашнинех йăлăхтарса çитернĕ колорадо нăррисем те кунта курăнмаççĕ, - кулкаласа палăртрĕç Тутарстан Республикинчи Арск районĕнчен килсе çитнĕ хăнасем. Сăмах май каласан, юнашар регионри "Кырлай" тулли мар яваплăхлă пĕрлешĕвĕн ĕçченĕсем "Слава картофелю" агрофирмăпа пĕрремĕш çул çеç мар çыхăну тытаççĕ. Вĕсене кунти çĕрулми чирлĕ пулманни килĕшет, тухăçĕ енчен те тивĕçтерет. Унтан ĕçлĕ ушкăн 9-мĕш уя çул тытрĕ. Кунта вара "Ред Скарлетт", "Эволюшен", "Вега", "Инара", "Эльмундо", "Лабадия", "Бриз", "Зорачка" тата ытти сортсем те çитĕнеççĕ. Тип-тикĕс йăранĕсем çине пăхсан чун савăнать, вĕсем çинче вара парка туналлă хитре авăрсем çитĕнеççĕ. Хăйсем кашниех е хĕрлĕ, е шурă, е кĕрен пĕркенчĕксем айĕнче. Тухăçĕ те çакăн евĕрех пысăк пуласси пирки иккĕленỹ те çук.
- Эпир тĕрлĕ хулари наукăпа селекци институчĕсемпе килĕштерсе ĕçлетпĕр. Вĕсем ыйтнипе çĕрулмин уйрăм сорчĕсене хамăр тăрăхра епле çитĕннине те сăнатпăр, - терĕ директор çумĕ Алексей Селиванов.
Хасиятулла Семигуллович ĕç-хĕлпе паллаштарса агрофирма аталанăвĕн çĕнĕ концепцийĕсемпе малашнехи тĕллевĕсем çинче те чарăнса тăчĕ. Агрофирмăра, чăнах та, пултаруллă ĕçченсем тăрăшаççĕ. Механизаторсемпе рабочисем пирки калас пулсан, вĕсем ăста алăллипе коллектив туслă пулнине палăртмалла. Хăйсене шаннă агротехника ĕçĕсене тĕплĕн пурнăçлаççĕ.
Пысăк тухăçлă çĕрулмине хĕл каçарасси - пирвайхи чи çивĕч ыйту. Çакна шута илсе агрофирма ертỹçисем Елчĕк районĕнчи Кỹлпуç ялĕнче ятарлă хранилище хута янă. Кунти ĕçченсем хĕлĕпех çĕрулмине тĕрĕслесе, складри температурăна виçсех тăраççĕ. Ăна вĕсем сутлăха хатĕрлеççĕ. "АСК-Яльчики" ОООн директорĕ Юрий Галкин тата "АСК" ОООн ĕç тăвакан директорĕ Рамиль Идиатуллин хранилище пирки тĕплĕн каласа пачĕç, унпа паллаштарчĕç тата кăсăклантаракан ыйтусем çине те хуравларĕç.
Семинара хутшăннисем çĕнĕ йышши техника, ỹсен-тăрана чиртен, сиенлĕ хурт-кăпшанкăран хỹтĕлемелли им-çам туса кăларакансемпе, вĕсене сутакансемпе те куçа-куçăн калаçрĕç. Уй кунне Комсомольскинчи тĕп базăра пĕтĕмлетрĕç. Раççейĕн тĕрлĕ регионĕсенчен килсе çитнĕ хăнасем малашне те "Слава картофелю" агрофирмăпах ĕçлесшĕн пулнине палăртрĕç. Семинар пуриншĕн те тухăçлă пулчĕ.
А.ИСАЕВА.
Источник: "Каçал Ен"